Балаларды жұлқылап, киімдерін лақтырған: Теміртауда балабақша тәрбиешісі жұмысқа мас келген

Теміртауда мемлекеттік балабақшаның тәрбиешісі жұмысына мас күйінде барған. Қызметтік тергеу нәтижесінде тәрбиеші мен балабақша директоры жұмысынан босатылды. Бұл туралы Azattyq Rýhy агенттігі «Патриот» Telegram каналына сілтеме жасап хабарлайды.

Тәрбиеші мас күйінде 30 қыркүйек күні «Айгөлек» балабақшасындағы жұмысына барып, балаларға агрессия көрсеткен. Полицияға мұғалімнің жұмысқа мас күйінде келгені туралы анонимді қоңырау түсті.

Полицейлер хабарлама бойынша келіп, тәрбиешіні медициналық куәландыруға алып кетті. Нәтижесінде орташа мас күйде болғаны анықталды.

Дереккөздің жазуынша, бұл факт туралы естігеннен кейін балалардың ата-аналары келесі күні балабақшаға келіп, мас тәрбиешінің балаларға қалай қарағанын білу үшін бейнекамералардан жазбаларды көрді. Ата-аналар видеодан мұғалімнің теңселіп жүргенін, балаларды жұлқылап, киімдерін лақтырғанын көрді. Видеоға полицейлердің кіріп, оны ғимараттан қалай алып кеткені жазылған. Бірақ ата-аналарға дәл осы сәтті көшіріп алуға рұқсат берілмеді.

«Теміртаудың білім бөлімі» мемлекеттік мекемесінің басшысы Халипа Жаудинова қызметтік тергеу аяқталғанын хабарлады.

«Сараптама көрсеткендей, тәрбиеші балабақшада мас күйінде болған. Ол өзінің түсіндірмесінде жексенбіде қандай да бір іс-шарада болғанын, сол жерде ішімдік ішкенін жазды. Ал дүйсенбі күні жұмысына келген», - деді Теміртаудың бас педагогы Халипа Жаудинова.

Балабақша асханасында алкоголь табылған жоқ.

«Қызметтік тергеу қорытындысы бойынша тәрбиеші педагогикалық этиканы өрескел бұзғаны үшін теріс себептермен жұмыстан шығарылды. Сондай-ақ, балабақша директорының міндетін атқарушы қызметінен босатылды», - деді Теміртау білім бөлімінің басшысы.