Таразда еліміздегі несие серіктестіктерінің VI форумы өтті

Халықаралық несие одақтар күнінде «Даму жолында бірге!» атты жыл сайынғы ауқымды форум өтті, деп хабарлайды Azattyq Rýhy.

Таразда пікірлестермен несие серіктестігінің ең өзекті мәселелерін, оларды шешу жолдарын талқылап, стратегиялық бағыттарды таңдау үшін 200-ге жуық адам бас қосты.

Форумды ұйымдастырушы – «АӨК-тің несие серіктестіктері қауымдастығы» ЗТБ. Талқылауға арналған алаңға Аграрлық несие корпорациясының өкілдері, таяу және алыс шет елдердегі несие кооперацияларының көшбасшылары мен несие серіктестіктерінің басшылары жиналды.

«Бүгін маған Тараздағы форумды ашу құрметі бұйырды. Ауыл шаруашылығы министрлігінің залында бас қосып, бірлестік құрғанымызға 11 жыл болды. Біздің несие серіктестіктерінде 24 мыңнан астам қатысушы бар», - деді жиналғандарға «АӨК-тің несие серіктестіктері қауымдастығы» ЗТБ басқарма төрағасы Альмира Сағат.

Альмира Сағат еліміздің ең шалғай аймақтарында қаржыландыруға қолжетімділікті қамтамасыз ететін несие серіктестіктерінің маңыздылығын сөз етті.

«Кез келген шаруа, егер оның несие тарихы жақсы болса және табысты бизнесі болса, несие серіктестігіне қосылуға өтініш бере алады. Өтініш қаралып, оны қабылдау туралы шешім жарияланады. Егер сіз қабылданған болсаңыз, қаржыландыруға өтінім бере аласыз және ол зерттеледі. Форумның арқасында серіктестіктер Аграрлық несие корпорациясына несие беруші ретінде қаржыландыру мүмкіндіктері, жаңа реттеу үрдістері және инновациялар туралы мүмкіндігінше көбірек білетін болады деп үміттенеміз. Қазақстан қор биржасы да осы мақсатта әрекет етпек. Әркім өзі үшін жаңа даму жолдарын табады деп ойлаймын», - деді А.Сағат.

«Аграрлық несие корпорациясы» АҚ Басқарма төрағасының орынбасары Айдын Досқараев 2024 жылы корпорация тарапынан Қазақстан бойынша несие серіктестіктеріне 140 млрд теңге бөлгенін атап өтті.

«Форум республикадағы ауыл шаруашылығын қаржыландырумен айналысатын несие серіктестіктерінің басын қосады. Бүгін пайдалы ақпараттармен және жаңалықтармен алмастық, алдағы өзгерістер мен жаңашылдықтарды талқыладық. Сондай-ақ, 2023 жыл мен 2024 жылдың бірінші жартыжылдығының қорытындысын шығарып, 2025 жылға арналған жоспарлар туралы әңгімелестік. Биыл біз Корпорацияның еншілес ұйымы «ҚазАгроҚаржы» АҚ-мен бірлесіп, барлық сала бойынша ауыл шаруашылығын қаржыландыру көлемін 700 млрд теңгеге жеткізуді жоспарлап отырмыз. «Бәйтерек» холдингінен ауыл шаруашылығын (егін шаруашылығы, мал шаруашылығы, құс шаруашылығы, аквамәдениет) қаржыландыру жылдан жылға рекордтық көрсеткіштерге жетіп келеді. Биыл біз фермерлердің субсидияланатын сыйақы мөлшерлемесін өзгерттік, енді ол ҚХА, «Бәйтерек» холдингі және Үкімет арасында тікелей жүретін болады», - деді Айдын Досқараев.

Сондай-ақ ол жаңашылдықтар шаруалардың жұмысын жеңілдететінін жеткізді. Осылайша, «Бәйтерек» холдингі аясында тығыз жұмыс істеген олар «Даму» қорымен бірлесіп, қосымша құрал енгізді. Мұнда кепілге қоюға мүлкі жеткіліксіз тұлғалар туралы сөз болып отыр. Енді кепілге қоятын мүлік болмаса, шаруалар қаржыландыруға өтініш беріп, «Даму» қорынан несие сомасының 85 пайызына кепілдік ала алады.

Ақмола облысынан келген «Аршалы» несие серіктестігінің төрағасы Қаржаубай Ахметжанов биылдың өзінде үш бағдарлама бойынша несие алғанын айтты.

«Кең дала» бағдарламасы бойынша біз 2,4 млрд теңгеге жуық қаржы алып, 5 пайызын қатысушыларымызға тараттық. Ал «АгроБизнес» бағдарламасы бойынша техника, ауыл шаруашылығы жануарлары және т.б. сатып алуға 1,4 млрд теңге алдық. Бізде 94 құрылтайшы бар, заңды тұлғалар, шаруа қожалықтары, жеке кәсіпкерлер бар. Шаруаларға ешқайда барудың қажеті жоқ, біз олардың барлық мәселесін шешіп, дайын жобаларды жүзеге асырып жатырмыз», - дейді Қ.Ахметжанов.

Бүгінгі таңда ауыл шаруашылығы саласында 209 несие серіктестігі жұмыс істейді, бұл 25 мыңға жуық қатысушы бар дегенді білдіреді. Барлығы да ілгері дамуға бағытталған және өз мүмкіндіктеріне сенеді.