Маңғыстаудағы жаппай улану: мектеп асханасы қызметкерлерінен стафилококк анықталды

Маңғыстау облысында мектеп оқушыларының тамақтан улануына байланысты зертханалық тексеріс нәтижелері белгілі болды. Бұл туралы Санитарлық-эпидемиологиялық бақылау департаменті мәлімдеді, деп хабарлайды Azattyq Rýhy Lada.kz-ке сілтеме жасап.

Маңғыстау облыстық Ұлттық сараптама орталығының зертханасының мамандары жоспардан тыс эпидемиологиялық тексеріс жүргізді. Зертханалық зерттеу үшін дайын тағамдардан, судан және асхана қызметкерлерінен сынамалар алынды.

Қорытынды бойынша, мектеп асханасында санитарлық-эпидемиологиялық зерттеу барысында өрескел санитарлық бұзушылықтар анықталды:

• Дайын тағам өнімдерінің сынамаларында (картоп пюресі, құс етінен жасалған котлеттер, тұздық және компот) патогенді бактериялар зертханалық жолмен дәлелденді;
• Алынған сынамалардың 20%-ында ішек бактерияларының бар екені анықталды;
• Асхананың 10 қызметкері, 1 медицина қызметкері және 1 жеке кәсіпкерге бактериологиялық зерттеу жүргізу нәтижесінде 6 маманнан стафилококк табылды;
• Зертханалық жағдайда дәлелденгендей, асхана қызметкері (ыдыс жуушы) бактериялық дизентерия тасымалдаушысы болып шықты, сондай-ақ бұл қызметкер тағам таратушы жұмысын атқарып, тағамдарды жұқтырған;
• Жеке медициналық кітапшаларын тексеру барысында 4 қызметкердің медициналық тексеруден жалған өткені анықталып, бұл факт бойынша облыстық прокуратура мен облыстық ішкі істер департаментіне хат жолданды.

«Қазіргі уақытта Мұнайлы ауданының полиция бөлімшесінде ҚР ҚК 304-бабының 1-бөлімі бойынша қылмыстық іс қозғалып, сотқа дейінгі тергеу басталды. Бұл жағдай ішек инфекциялық ауруларының кластерлі бактериалық таралуына алып келді», - деп хабарлады Маңғыстау облысының санитарлық-эпидемиологиялық бақылау департаменті.

Еске сала кетейік, 7-13 қыркүйек аралығында Мұнайлы ауданының Бесшоқы тұрғын массивінде орналасқан №8 орта мектепте «Жаппай тағамнан улану» тіркелген болатын. 460 бала зардап шекті.