Румыниядағы су тасқыны кем дегенде төрт адамның өмірін қиды, табиғи апат Орталық Еуропаға әсер етуде

Ресми өкілдердің хабарлауынша, сенбі күні Румынияның шығысында болған су тасқыны салдарынан кем дегенде төрт адам қаза тауып, мыңдаған үй зақымданды. Өзен деңгейінің көтерілуі Орталық және Шығыс Еуропаның көп бөлігіндегі билікті бірнеше күндік нөсер жаңбырдан кейін жоғары дайындық режиміне көшуге мәжбүр етті, деп хабарлайды Azattyq Rýhy Reuters ақпараттық агенттігіне сілтеме жасап.

Румыния мен Чехияда он мыңдаған үй жарықсыз қалды, алдағы күндері жауын-шашынның тағы да болатыны болжануда. Польша, Словакия, Венгрия, Германияның оңтүстігі және Австрияның кейбір бөліктерінде де қатты жаңбыр күтілуде.

Чехия мен Польшаның шекарасына жақын кейбір қалалардың тұрғындары эвакуацияланды, себебі өзен деңгейі қауіпті межеден асып кетті. Ал 2002 жылы апатты су тасқынынан зардап шеккен Прага қаласында алдын алу шаралары қабылданды.

Румынияда су тасқыны сегіз аумаққа әсер етті, деп хабарлады елдің төтенше жағдайлар басқармасы. Ал премьер-министр Марчел Чолаку қатты зардап шеккен Галац уезіне барып, онда төрт адамның қаза тапқанын, шамамен 5000 үйдің зақымданғанын және 25 000 адамның электр жарығынан ажыратылғанын мәлімдеді.

БАҚ-тың хабарлауынша, Чехияда су тасқыны негізінен солтүстік және солтүстік-шығыс аймақтарға әсер етіп, 51 000 үйді электр жарығынан ажыратты.

Синоптиктер жексенбіге қарай елдің кейбір бөліктерінде жылдық жауын-шашын мөлшерінің үштен бір бөлігінен астамы жаууы мүмкін екенін ескертті. Ал Чехияның қоршаған орта министрі Петр Хладик зардап шеккен аймақтардағы тұрғындарды үйлерін тастап кетуге дайын болуға шақырды.