V Дүниежүзілік көшпенділер ойындары туралы промо-ролик түсіруге арналған байқау өз мәресіне жетті
Байқаудың қорытындысы келесі аптада шығады
Мобилографтар арасында V Дүниежүзілік көшпенділер ойындары туралы промо-ролик түсіруге арналған байқау өз мәресіне жетті. Бұл туралы Қазақстан Республикасы Президентінің кеңесшісі – Президенттің Баспасөз хатшысы Берік Уәли өзінің Facebook парақшасында жариялады, деп хабарлайды Azattyq Rýhy.
Белгілі болғандай, сайысқа 2500-ге жуық азамат қатысты. Қазақстаннан бөлек Қырғызстан, Әзербайжан, Моңғолиядан да мобилографтар атсалысты.
«Конкурс нәтижесіне көңіл толады. Әлеуметтік желілерде Ұлы дала дүбірін жан-жақты насихаттап, белсенділік танытқан барлық қатысушыға ризашылық білдіреміз», - деп жазды Берік Уәли.
Байқауға келіп түскен жұмыстардың қорытындысы:
- TikTok желісінде 616 видео жарияланып, қаралым саны 5 779 909 жетті.
- Instagram желісінде 636 рилс жарық көріп, 4 587 129 рет қаралды.
- WhatsApp және Telegram статусындағы орташа қаралымдар – 80 000.
- Жасырын қаралымдар – 19 000.
- YouTube Shorts: қаралым саны – 6 249 178.
Көшпенділер ойындары туралы түсірілген видеолардың жалпы қаралымы – 16 715 216.
«Бір қуантарлығы, видеолар ел ішінде өте жылдам таралып жатыр. Мысалы, бір промо-ролик бір күнде 6 миллион рет қаралған. Бұл – үлкен көрсеткіш. Сондықтан байқау аяқталғанға дейін видеолардың қаралымы да арта түсетіні сөзсіз. Байқаудың қорытындысы келесі аптада шығады», - делінген жазбада.
