«Балаларды балағаттаған»: Қостанайда 72 жастағы зейнеткерге қатысты сот үкімі шықты

Қостанайда зейнеткерге қатысты ұсақ бұзақылық туралы істі мамандандырылған әкімшілік сот қарады, деп хабарлайды Azattyq Rýhy жергілікті Alau.kz-ке сілтеме жасап.

Қостанай облыстық сотының мәліметінше, 13 тамызда 72 жастағы ер адам қоғамдық орында кәмелетке толмағандарға қатысты балағат сөздер айтып, айналасындағыларға құрметсіздік танытып, қоғамдық тәртіп пен жеке тұлғалардың тыныштығын бұзған.

Бұл жағдайда сотталушы әкімшілік құқық бұзушылық жасағаны үшін кінәні толық мойындады.

Сот қаулысымен ол ұсақ бұзақылық жасағаны үшін кінәлі деп танылып, 20 АЕК, 74 мыңға жуық айыппұл түрінде әкімшілік жазаға тартылды.

Алайда ол үшін өндіріп алу сомасы 30%-ға төмендетілді.

Сот шешімі заңды күшіне енген жоқ.