Данияда атақты спортшы турнирде транс әйелге қарсы ойнаудан бас тартты

Дартс бойынша әлем чемпионатының үш дүркін финалисі Дета Хедман 27 жастағы транс әйел Ноа-Линн ван Левенге қарсы ойнаудан бас тартты. Бұл туралы Azattyq Ruhy агенттігі Bild басылымына сілтеме жасап хабарлайды.

Данияда өткен WDF турнирінде ван Левен мен Хедман ширек финалда кездеседі деп жоспарланған болатын. Алайда, Хедман матчқа бойкот жариялады және ол турнирден шыққаннан кейін ван Левенді сынға алды.

«Мен әйелдер арасындағы турнирде ер адамға қарсы ойнамаймын», - деді ол.

64 жастағы спортшы трансгендерлердің әйелдер жарысына қатысуына үзілді-кесілді қарсы. Турнирге қатысудан бас тартқан ол өз ұстанымын тағы да нақтылағысы келді.

«Мен спорттан ләззат алу тоқтаған кезде оны тастаймын деп айтатынмын. Әйелдер дартындағы қазіргі проблемалардан кейін бұл сәт жақындап келеді», - деп жазды Хедман X (бұрынғы Twitter) желісінде.

Ноа-Линн ван Левен 2014 жылдан бері өзін әйелмін деп санайды: өзіне ота жасатып, гормондық терапия жүргізілді. Содан бері ван Левен әйелдер турнирлеріне қатысып келеді. Наурызда Хильдесхаймдағы PDC әйелдер турнирінде жеңіске жеткеннен кейін голландиялық әйел сынға ұшырады. Кейіннен оның ұлттық құрамадағы кейбір әріптестері командадан кетті.