Шымкенттен Түркияға бағыт алған жүк көлігі өртеніп кетті

Атырау облысында жүк көлігіндегі 22 тонна мақта түгі қалмай өртеніп кетті. Өңірлік төтенше жағдайлар департаменті қоғаммен байланыс тобының мәліметінше, оқиға 12 сәуірде сағат 12:55-те болған, деп хабарлайды Azattyq Ruhy.

«Атыраудан Ресейдегі Астрахан облысына қатынайтын жол бойындағы Тұщықұдық ауылының тұсында жүк көлігінің тіркемесі өртенді. Жүк көлігі Грузияда тіркелген. Көліктің Шымкент қаласынан шығып, Түркияға бағыт алғаны анықталды. Оның тіркемесіне тиелген 22 тонна мақта түгелдей жанып кетті», - хабарлады департаменттің қоғаммен байланыс тобы.

Ведомство мәліметінше, өрт сағат 13:47-де оқшауланған. Ал, сағат 14:20-да толығымен сөндірілді.

Қазір өрттің шығу себебі анықталып жатыр.