Бразилияның әйгілі футболшысы ұзақ мерзімге сотталды

Бразилия құрамасының, «Реал» мен «Милан» футбол клубтарының бұрынғы шабуылшысы Робиньоны (Робсон де Соуза) Бразилия полициясы 10 жыл бұрын Италияда қыз зорлағаны үшін тоғыз жылға бас бостандығынан айыру жазасын өтеу үшін қамауға алды. Бұл туралы Azattyq Ruhy агенттігі BBC-ге сілтеме жасап хабарлайды.

«Бейсенбі күні кешке федералды полиция Робиньо деп аталатын Робсон де Соузаны тұтқындауға санкция берді», - делінген полиция мәлімдемесінде.

40 жастағы Робиньо Сан-Паулу штатындағы Сантус қаласындағы пәтерінде қамауға алынды. Бұрын жергілікті судья оның төлқұжатын тәркілеп, елден кетуге тыйым салған.

Айта кетейік, 2017 жылы Италия соты футболшыны тоғыз жылға бас бостандығынан айырды, оны және тағы бес адамды 2013 жылы Милан қаласының түнгі клубында 22 жастағы Албания азаматын топтық зорлағаны үшін кінәлі деп тапты.

Робиньо айыптауларды жоққа шығарды және үкімге шағымданды, бірақ апелляциялық сатылар оны күшінде қалдырды.

2022 жылдың қаңтарында Италияның жоғарғы кассациялық соты үкімді түпкілікті растады, осыдан кейін Италияның әділет министрлігі футболшыны тұтқындауға халықаралық санкция берді.

Италия билігі Робиньоны экстрадициялау туралы өтініш жіберді, бірақ Бразилия өз азаматтарын шет мемлекеттерге бермейтіндіктен бас тартты.

Осыдан кейін Италия үкіметі футболшыдан Бразилияда жазасын өтеуді талап етті. Сәрсенбіде Бразилия соты бұл шешімді қолдады және Робиньо үй қамауында емес, темір тордың артында жазасын өтеуі керек деген шешім қабылдады.