Перуде денге безгегі өршіді
Вирустың жылдам тарауына аптап ыстық пен толассыз жауын әсер еткен
Перуде денге безгегі өршіді. Осыған байланысты елдің көптеген өңірінде төтенше жағдай жарияланды, деп хабаралайды Azattyq Ruhy Reuters-ке сілтеме жасап.
Вирустың жылдам тарауына аптап ыстық пен толассыз жауын әсер еткен.
Денсаулық сақтау министрі Сезар Васкестің мәліметінше, Оңтүстік Америкадағы денге вирусынан қайтыс болғандар саны 32-ге жетті.
«Денге ауруының таралуына байланысты 25 аймақтың 20-на төтенше жағдай жарияланды», - деді Васкес жергілікті RPP радиостанциясына берген сұхбатында.
Қазіргі уақытта вирусты жұқтырғандар елдің солтүстік өңірінде көп, науқастар ауруханаларға сыймай жатыр.
Денге безгегінің негізгі тасымалдаушысы – маса. Аптап ыстық пен толассыз жауған жауын масаның жылдам көбейіп, вирустың таралуына әсер еткен. Ауру тасушы жәндік шаққаннан кейін адамның жүрегі айнып, құсып, өзін дел-сал сезінеді.
Ресми мәліметтерге сәйкес, өткен жылы Перуде денге безгегімен 269 216 адам ауырып, 428 адам көз жұмған.
Аударған: Айжан ТЕМІРХАН
