«Құны 1,1 млрд теңгені құрайды»: Каспий жағалауында орналасқан 3 учаске мемлекетке қайтарылды

Прокурорлық қадағалау шаралары бойынша биыл Маңғыстау облысындағы Қарақия ауданы мен Каспий теңізінің жағалауында орналасқан құны 1,1 млрд теңге, ауданы 696,8 га құрайтын 3 учаске игерілмегені үшін мемлекетке қайтарылды, деп хабарлайды Azattyq Ruhy mangystaumedia.kz-ке сілтеме жасап.

Облыс прокуратурасы тұрақты негізде нысаналы мақсатына сай пайдаланылмайтын жер учаскелерін анықтау мақсатында талдау жүргізді. Нәтижесінде Ақтау қаласының аумағында мемлекеттік меншіктегі жер учаскелерін заңсыз пайдаланудың 61 дерегі анықталды.

Одан бөлек, облыс бойынша 57 ШҚ-мен 44 850 га құрайтын ауыл шаруашылығы мақсатындағы жерлерді ұтымсыз пайдалану фактілері анықталды.

«Өз кезегінде, ауыл шаруашылығы жануарларының саны айылымдардың жалпы алаңына шекті рұқсат етілген жүктеме нормасына (20%-ға аз) сәйкес келмей, жер учаскелері пайдаланылмаған. Осыған орай, кінәлілерді әкімшілік жауаптылыққа тарту және жер учаскелерін мемлекет меншігіне қайтару мақсатында облыс прокуратурасымен прокурорлық қадағалау актісі енгізілді. Бұл бағыттағы жұмыс жалғасуда», деді Маңғыстау облыстық прокуратурасы.