Газа секторы: «Халық жалпы аштыққа ұшырауы мүмін»

Израиль өткен жылдың қазан айында ХАМАСҚА шабуыл жасай бастағаннан бері Газа секторындағы тұрғындардың 85%-ы мәжбүрлі қоныс аударушыларға айналды және Палестинаның 2 миллиондық анклавының барлық дерлік халқы аштыққа ұшырады, деп хабарлайды Azattyq Ruhy Euronews-ке сілтеме жасап.

Газаның барлық тұрғындары дерлік көмекке мұқтаж. Жақында Дүниежүзілік азық-түлік бағдарламасы БҰҰ-ның басқа агенттіктерімен бірлесіп, гуманитарлық көмекке қол жетімділікті жеңілдетуге және жеделдетуге шақырды.

Бірлескен мәлімдемеде Газадағы палестиналықтарға гуманитарлық көмектің жетуі үшін кіру маршруттарын кеңейту және күн сайын шекара бекеттері арқылы көбірек жүк көліктерін өткізу қажет делінген.

«Жағдай өте күрделі, үміт аз. Бүкіл халық - 2,2 миллион адам - азық-түлік көмегіне мұқтаж. Біз олардың барлығы азық-түлік қауіпсіздігінің дағдарыс деңгейінде екенін көрсететін IPC есебін әзірледік. Ел халқының төрттен бір бөлігі - 500 000 адам - апатты жағдайда және мұндай бұрын-соңды болмаған. Егер де халықтың ең осал топтарына азық-түлікті жеткізу талаптарына өзгеріс енгізілмесе, нағыз аштық басталады», - деді Дүниежүзілік азық-түлік бағдарламасының атқарушы директорының орынбасары Карл Скау.

Соғысқа дейінгі кезеңмен салыстырғанда Газаға күн сайын келетін гуманитарлық жүк көліктерінің саны 500-ден 30-ға дейін азайды.

«Жүктерді Иорданиядан Газаға немесе Египеттен Газаға жеткізу тұрғысынан үлкен бюрократия бар. Сондықтан біз бұл процесті жеңілдетуіміз керек, осылайша біз шекараларға көмек жеткізе аламыз, содан кейін оны шекарадан өткізуіміз керек. Күтетін ештеңе жоқ, халықтың күнделікті өмірін жалғастыру үшін қазір жағдайды өзгерту керек», - деді Карл Скау.

Жалпы аштық Газадағы соғыс құрбандарының санын көбейтуі мүмкін, ол қазірдің өзінде 25000-нан асты.