АҚШ-та коронавирустан бір тәулікте 2 мыңға жуық адам көз жұмды

АҚШ коронавирус құрбандарының тәуліктік саны жағынан антирекорд орнатты. Бұл мәліметті Джонс Хопкинс университетінің мамандары хабарлап отыр деп жазады РИА Новости.

Соңғы тәулікте Америка Құрама штаттарында 1 965 адам қайтыс болған. Елде COVID-19 вирусынан көз жұмғандардың саны 14 768 адамға жетті.

Айта кетейік, тәуліктік өлім саны жағынан 7 сәуірге дейін Италия бірінші орында тұрған болатын. 3 сәуірде мұнда 1 169 адам қайтыс болған. Ал, 7 сәуірде АҚШ-та коронавирус құрбандарының саны 1736-ны көрсетіп, антирекорд орнатты. Өкінішке қарай, бүгін бұл көрсеткіш тағы жаңарды.

АҚШ коронавирус жұқтырғандардың саны жағынан да әлемде бірінші орында тұр. Мұнда барлығы 431 мың адам аталған ауруға шалдыққан. Жазылғандар саны – 23 мың.