Қазақстандық әуе компаниялары жаңа рекорд орнатты

Azattyq Rýhy

Авиация саласында әуе көлігін пайдалану мәдениеті белсенді түрде қалыптасып келеді

Қазақстандық әуе компаниялары жаңа рекорд орнатты
Фото: gov.kz

Биыл қазақстандық авиакомпаниялар рекордтық көрсеткішке қол жеткізіп, тасымалданған жолаушылар саны 13 млн-ға жетті, деп хабарлайды Azattyq Ruhy Көлік министрлігіне сілтеме жасап.

Авиация саласында әуе көлігін пайдалану мәдениеті белсенді түрде қалыптасып келеді. Әуе тасымалдар халық арасында көліктің неғұрлым танымал түріне айналуда, жолаушылар тасымалының 23%-ға ұлғаюы мұның бірден бір дәлелі.

«Қазақстандық авиакомпанияларда әуе кемелерінің паркі 89-дан 99 бірлікке дейін, ал кресло-орындардың сыйымдылығы 12-ден 15 мыңға дейін ұлғайтылды. Қабылданған шаралар әуе тасымалдардың қолжетімділігін жақсартуға және рейстердің жүйелілігін арттыруға мүмкіндік береді», - делінген хабарламада.

Жеке инвестициялар есебінен Шымкент, Қызылорда және Алматы қалаларында 3 жаңа жолаушылар терминалының құрылысы жүргізілуде. Аталған нысандар келесі жылдың наурыз, мамыр және маусым айларында аяқталады деп жоспарланып отыр.

Барлық өңірді қолжетімді авиатасымалдармен қамту мақсатында 23 ішкі әлеуметтік маңызы бар және туристік бағыт субсидияланды.

«Жыл соңына дейін қазақстандық әуежайлар 25 млн-нан астам жолаушыға қызмет көрсетеді, бұл 2022 жылмен салыстырғанда 22%-ға артық», - делінген министрлік хабарламасында.

Ішкі тасымалдау көлемі толығымен қалпына келтірілді және аптасына 50 бағыт бойынша 640 рейсті құрайды.

28 елмен халықаралық әуе қатынасы жолға қойылған. Биыл 23 бағыт бойынша 13 елге жаңа рейстер жаңартылып, ашылды.

×
Бұл желілік ресурстың ақпараттық өнімдері 18 жастан асқан адамдарға арналған.