Ақмола облысында 37 су қоймасы мақсатқа сай пайдаланылмаған
Әрбір оныншы пайдаланылмаған су қоймасы мемлекетке қайтарылды
Ақмола облысының табиғат қорғау прокуратурасы бекітілген 37 су қоймасы мен кәсіпшілік учаскелерін мемлекетке қайтарды, олардың ауданы 10-нан 1900 гектарға дейін жетеді, деп хабарлайды Azattyq Ruhy.
Облыстық прокуратура жүргізген талдау арқылы бекітілген су қоймаларын пайдалану кезінде өрескел заңбұзушылықтар анықталды.
«Атап айтқанда, балық аулау ережелері жүйелі түрде бұзылған, балық ресурстарын қорғау бойынша қорықшылық қызметтер болмаған, балық аулау жүргізілмеді, мелиорациялық және бітелуге қарсы іс-шаралар мүлдем назардан тыс қалған. Сондай-ақ балық аулау лимиттері ихтиофаунаны міндетті биологиялық тексерусіз бекітілді», - делінген хабарламада.
Қалыптасқан жағдайды түзету үшін облыс әкімдігі мен балық инспекциясына прокурорлық қадағалау актілері жіберілді.
«Сотқа дейінгі жұмыстар мен сот талқылауларының нәтижесінде заңбұзушылықтарды жою туралы 73 хабарлама мен ұсынымдар берілді. Бекітілген 397 су қоймасы мен кәсіпшілік учаскелерінің 37-сі мемлекетке қайтарылды. Яғни, әрбір 10 су қоймасы өз мақсатына сай пайдаланылмаған», - деді ведомство өкілдері.
Қазіргі уақытта адал емес пайдаланушылармен балық шаруашылығын жүргізуге арналған шарттарды бұзу туралы 2 талап сотта қаралып жатыр.
