Қызылжарда қаржы пирамидасына жетекшілік еткен экс-полицейлерге қатысты қылмыстық іс қозғалды

Қызылжарда экс-полицейлер қаржы пирамидасын құрып, жұртты арбауына түсірген. Экономикалық тергеу департаменті Qnet компаниясының өкілдеріне қатысты қылмыстық іс қозғады, деп хабарлайды Azattyq Rýhy Астана арнасына сілтеме жасап.

Сала мамандарының айтуынша, заңсыз кәсіпорын 2018-2021 жылдары жұмыс істеген. Осы уақыт аралығында қаржы пирамидасының арбауына 70 адам түскен. Шығын көлемі 80 миллион теңгеден асады. Бұл компанияға құқық қорғау органдарының бұрынғы қызметкерлері жетекшілік еткен. Қазір экономикалық тергеу департаментінің өкілдері аталған топтан жапа шеккен тағы бірқатар азаматты іздестіріп жатыр.

 «Қаржы пирамидасын құрған бұрынғы полиция қызметкерлері халық арасында сыйлы болған. Олар жұрттың сенімін пайдаланып, Qnet-ке тартып отырған. Жапа шеккен азаматтардың арасында қарамағанда жұмыс істеген әріптестері, жолдастары, таныстары бар. Әрбіреуі бастапқы жарна ретінде 600-800 мың теңге салған. Алайда, ақшасын қайтара алмаған. Қаржылық пирамида өкілдері қамауға алынды. Тергеу аяқталғасын олардың істері сотқа жолданады», - деді СҚО бойынша Экономикалық тергеу депараментінің қызметкері Жанна Сарымсақова.