ҚазҰАЗУ-де студенттер мен жас ғалымдарға арналған жатақхана салынады

Қазақ ұлттық аграрлық зерттеу университетінде 30 жылда алғаш рет студенттер мен жас ғалымдарға арналған жатақхана салынбақ, деп хабарлайды Azattyq Ruhy.

Университеттің баспасөз қызметі хабарлағандай, соңғы жылдары өкінішке қарай, Қазақ ұлттық аграрлық зерттеу университетінің материалдық-техникалық базасын нығайтуға тиісті көңіл бөлінбеді. Оның орнына жоғары оқу орнының көптеген нысандарын жеке тұлғалар жекешелендіріп алды, университеттің студенттік жатақханалары мен оқу ғимараттарында жылдар бойы күрделі жөндеу жүргізілмеді.

«Қазіргі уақытта университетке заңсыз шығарылған активтерді қайтару жұмыстары басталды.  Мысалы, №6 студенттік жатақхана оқу ордасының тұрғын үй қорына қайтарылды және қосымша 280 студент жатақханадағы орындармен қамтамасыз етілді. Жақын арада күрделі жөндеу жүргізіліп жатқан №3 жатақхананы пайдалануға беру жоспарлануда», - делінген ҚазҰАЗУ хабарламасында.

Ең бастысы, қазіргі заманғы үлгіде салынатын 450 орындық жаңа 9 қабатты студенттік жатақхананың құрылысы биылғы қарашаның басында мемлекеттік-жекешелік әріптестік негізінде отандық инвесторлардың қолдауымен басталады. Ғимараттың жалпы ауданы – 6 714,3 шаршы метр.

Сонымен қатар жатақханада студенттерге қызмет көрсететін, ауданы 398,2 шаршы метрлік медициналық орталық тұрғызылмақ.

«Осы ауқымды жобаның нәтижесінде, ҚазҰАЗУ Алматы қаласындағы өз студенттерін жатақханадағы орындармен толық қамтамасыз еткен жалғыз университет атанды. Жоғарыда көрстеліген ҚазҰАЗУ жетістіктері – Жаңа Қазақстан жағдайындағы ұжым қызметінің атқарған жарқын мысалдарының бірі», - дейді университет өкілдері.