Қазақстанда телерадио хабар тарату қызметі қалпына келтірілді

Цифрлық даму, инновациялар және аэроғарыш өнеркәсібі министрлігі ел аумағында спутник жүйесі бойынша телерадио хабар тарату қызметі қалпына келтірілгенін мәлім етті, деп хабарлайды Azattyq Rýhy.

«16 қыркүйекте сағат 10:11-де спутник бойынша телерадио хабарларын тарату қалпына келтірілді. «Республикалық ғарыштық байланыс орталығы» АҚ аталған жүйенің қызметін қалпына келтіру үшін таңертеңге дейін жұмыс істеді», - делінген хабарламада.

Атап айтқанда, дәл қазір басқа да байланыс қызметтерін қалпына келтіру жұмыстары жалғасып жатыр. Сондай-ақ KazSat-3 ғарыш аппаратындағы осы ақаудың болуы себебін анықтау іс-шаралары атқарылады.

Бұдан бұрын хабарланғандай, «Қазтелерадио» АҚ қазақстандық KazSat-3 спутнигіндегі төтенше жағдайға байланысты OtauTV пакеттеріндегі кейбір қазақстандық және шетелдік телеарналардың жұмысында мәселе туындаған болатын.