Қотырбұлақ шатқалында жоғалып кеткен екі турист табылды

Алматы облысындағы Қотырбұлақ шатқалында жоғалып кеткен екі турист табылды, деп хабарлайды Azattyq Ruhy.

«24 тамыз күні кешкі сағат 20:21-де Талғар ауданы, Қотырбұлақ шатқалында екі турист жоғалып кеткені туралы хабарлама келіп түсті. Өтініш берушілерде байланыс болып, құтқарушыларды өздері шақыра алды. Оқиға орнына ТЖМ Республикалық жедел-құтқару жасағының құтқарушылары шықты. Құтқарушылар адасып кеткен адамдарды 22:14-те Алатау туристік кешенінің Қотырбұлақ шатқалы ауданында тауып алды. Медициналық көмек қажет болған жоқ. Букреев шыңынан Медеуге қарай түсу кезінде туристер көрсеткіштен өтіп кетіп, адасып кеткен», - деп хабарлады ТЖМ Республикалық жедел-құтқару жасағының баспасөз қызметі.

ТЖМ құтқарушылары еске салады: тауға шықпас бұрын, бір күнге шықсаңыз да бағытты мұқият зерттеңіз, мүмкіндік болса офлайн режимінде пайдалануға ыңғайлы етіп, бағыт картасын жүктеп алыңыз. Күтпеген оқыс оқиға болса көмекке жүгіну үшін 112 немесе 8 (727) 3721560 (Алматы қ. ТЖМ Республикалық жедел-құтқару жасағы) нөмірлеріне қоңырау шалыңыз.