Жаңа рекорд: ҚР Ұлттық музейіне бір түннің ішінде 47 мыңнан астам адам келді

18 мамыр күні Ұлттық музей еліміздегі адам ең көп жиналған орынға айналды. ҚР Мәдениет және спорт министрлігінің қолдауымен елордалық музей халықаралық музейлер күніне орай «Музейлер түні» атты ауқымды халықаралық акция өткізді. Министр Асхат Оралов іс-шараның ашылу салтанатына қатысты, деп хабарлайды Azattyq Ruhy ведомсвтоның баспсөз қызметіне сілтеме жасап.

Ұлттық музейге барлығы 47 мыңнан астам адам келді. Осылайша, өткен жылғы рекорд жаңартылды. Былтыр бұл акцияға 30 мыңға жуық адам келген болатын.

Ауданы 74 мың шаршы метрді құрайтын және 200 мыңнан астам экспонаты бар елдегі ең үлкен музейде ине шаншар жер болмады.  

Асхат Оралов іс-шараға жиналған келушілерге құттықтау сөз сөйлеп, содан кейін Ұлттық музей қызметкерлерін кәсіби мерекемен және алдағы мәдениет және өнер қызметкерлері күнімен құттықтады.

«Музейлер түні» — отандық мәдени қызметкерлер күнін мерекелеуге арналған іс-шаралар бағдарламасының бір бөлігі. Салтанатты рәсім барысында Министр еліміздің әр өңірінен келген үздік музей қызметкерлерін «Мәдениет саласының үздігі» төсбелгісімен марапаттады.

 Ұлттық музей қабырғасында концерттік және ойын-сауық бағдарламалары, ойындар, квесттер, дәрістер, музей реставраторларының шеберлік сабақтары, қолөнершілер жәрмеңкесі, театрландырылған экскурсиялар және бірден бірнеше экспозиция ұйымдастырылды. Келушілер «Музейлер түніне» арнайы дайындалған кітаптар мен авторлық қуыршақтар көрмесін тамашалады, сондай-ақ белгілі тарихшылар мен басқа да танымал тұлғалар экскурсиялар өткізген «Жұлдызды гид» жобасына қатысты.

Мыңдаған келушілермен бірге Асхат Оралов бірнеше залды аралап, оларда ұсынылған экспонаттармен танысты. Атап айтқанда, жақында ашылған Палеонтология залы қонақтар арасында ерекше танымал болды. Сондай-ақ, Министр медиаменеджер Арманжан Байтасов жүргізген «жұлдызды» экскурсияға барды. Іс-шарада басқа елдерден көптеген қонақтар болды.

 «Елорда тұрғындары мен қонақтарымен осы мерекелік кешті бөлісу өте қуанышты. Астанадағы «Музейлер түні» естен кетпестей думанға толы болды десем, қателеспеймін деп ойлаймын. Бұл қазақстандықтардың өз мәдениетіне, тарихына және өнеріне деген қызығушылығының артып келе жатқанын көрсетеді. Біздің міндетіміз — осындай іс-шаралар арқылы адамдарға еліміздің рухани мұрасын қолжетімді ету», - деп атап өтті ҚР Мәдениет және спорт министрі.