Жаңаөзенде құны 1 млрд теңгеден асатын комбинат мемлекетке қайтарылды
Бұл туралы облыстық прокуратура хабарлады
Маңғыстау облысында құны 1 млрд теңгеден асатын комбинат мемлекетке қайтарылды, деп хабарлайды Azattyq Ruhy.
Облыстық прокуратура мәлім еткендей, 2019 жылы қатты тұрмыстық қалдықтарды қайта өңдеу және көму комбинаты «Тазалық-С» ЖШС сенімгерлік басқаруына берілген.
«Жаңаөзен қаласының прокуратурасы анықтағандай, ЖШС оған комбинатты беруге негіз болған міндеттемелерін орындамаған.
Атап айтқанда, комбинат арнайы техниканың жеткілікті санымен қамтамасыз етілмеген, қатты-тұрмыстық қалдықтарды қайта өңдеу өндірісі кеңейтілмеген, полимерлі құбырлар өндірісі іске асырылмаған», - делінген хабарламада.
Прокуратураның қадағалау актісі бойынша Жаңаөзен қаласының әкімдігі мамандандырылған ауданаралық экономикалық сотына сенімгерлік шартты тоқтата тұру туралы талап арыз беріп, ол толығымен қанағаттандырылған.
Апелляциялық сатымен жоғарыда аталған соттың шешімі өзгеріссіз қалдырылды.
«Нәтижесінде баланстық құны 1 млрд теңгеден асатын мүліктік кешен жергілікті атқарушы органның коммуналдық меншігіне қайтарылды», - делінген хабарламада.
