Ақтөбеде қоқыс полигонынан табылған шақалақтың анасына қатысты қылмыстық іс жабылды

Ақтөбеде қоқыс полигонынан табылған шақалақтың анасына қатысты қылмыстық іс 6 айдан кейін жабылды. Себебі бала өлі туған, деп хабарлайды Azattyq Rýhy Ақтөбе облыстық ПД баспасөз қызметіне сілтеме жасап.

Оқиға 2022 жылдың 23 қазан күні Ақтөбе облысы Қарғалы ауданында болды.

Департамент мәліметінше, Қарғалы ауданы полициясының кезекші бөліміне Қарғалы ауданы Бадамша ауылы маңындағы «Рождество-Дөң» тасжолының бойында орналасқан қоқыс полигонынан қара полиэтилен пакеттен шақалақтың денесі табылғаны анықталды.

«Оқиға орнына жедел тергеу тобы жіберілді. Аталған факті бойынша Қазақстан Республикасы Қылмыстық кодексінің 100-бабы, яғни «Анасының жаңа туған нәрестені өлтіруі» бойынша сотқа дейінгі тергеу амалдары басталып, баланың анасын анықтау бойынша жедел іс-шаралар жүргізіліп жатыр», - делінген хабарламада.

Арада 6 ай уақыт өткенде істің қысқарғаны белгілі болды.

«Қылмыстық кодекстің «Анасының жаңа туған нәрестені өлтіруі» бабы бойынша іс қозғалғанымен, сараптама қорытындысынан кейін баланың өлі туғаны белгілі болды. Қылмыстық құрам болмаған соң іс жабылды»,- деді Ақтөбе облыстық ПД баспасөз қызметінің жетекшісі Ерболат Сарқұлов.