Ақтөбе облысында пара алған мектеп директоры 18 млн теңге айыппұл төлейтін болды

Ақтөбе облысы Шалқар ауданында мектеп директоры 600 мың теңге пара алып ұсталды. Ол енді 18 млн теңге айыппұл төлейді, деп хабарлайды Azattyq Rýhy Шалқар аудандық сотының баспасөз қызметіне сілтеме жасап.

Шалқар аудандық сотында №6 мектеп директоры Жаңабай Мусинге қатысты қылмыстық іс қаралды. Оған Қылмыстық кодекстің «Пара алу» бабы бойынша айып тағылды.

Іс материалына сүйенсек, мектеп директоры зертханашы лауазымына жұмысқа орналастыру үшін танысынан жалпы сомасы 600 000 теңге көлемінде пара алған. Сот отырысында сотталушы өз кінәсін толық мойындады, өкінетінін айтты.

«Сот шын жүректен өкінгенін, кінәсін мойындағанын, қылмыстық құқық бұзушылықты ашуға белсенді түрде қатысқанын, ерікті түрде залалды өтегенін, балаларын негізге алып, мұны қылмыстық жауапкершілік пен жазасын жеңілдететін мән-жайлар деп таныды. Ал қылмыстық жауаптылық пен жазаны ауырлататын мән-жайлар анықталған жоқ. Сот үкімімен М. кінәлі деп танылып, оған өмір бойы мемлекеттік қызметте қызмет атқару құқығынан айырыла отырып, параның 30 еселенген сомасы мөлшерінде, яғни, 18 000 000 теңге көлемінде айыппұл түрінде жаза тағайындалды. Сонымен қатар сот Ақтөбе облысы білім басқармасының басшылығына жеке қаулы шығарылды. Сот үкімі заңды күшіне енген жоқ», - деп хабарлады Шалқар аудандық сотының баспасөз қызметі.