ЕҚЫҰ миссиясы елдегі сайлаудың дайындығына оң баға берді

ЕҚЫҰ-ның сайлауды бақылау жөніндегі қысқа мерзімді миссиясының арнайы үйлестірушісі және жетекшісі Ирен Чараламбидес елдегі сайлаудың ұйымдастырылуы туралы айтты, деп хабарлайды Azattyq Ruhy.

«Мәжіліс пен мәслихаттар депутаттарының өткен сайлауы бәсекеге қабілеттілікті жақсартып, жалпы саяси өмірді жандандырды», – деді Ирен Чараламбидес баспасөз мәслихатында.

Ол сайлауға дайындық туралы оң пікір білдірді.

«Жалпы сайлау өткізу жөніндегі органдар бұл сайлауға жақсы дайындалған. Сайлау жақсы деңгейде өтті. Біз белгілі бір жағымды оқиғалардың куәсі болдық, бірақ әлі де көп нәрсе істеу керек. Бұл - динамикалық процесс. Жалпы реформа деген бір күнде тез жүзеге асырылатын дүние емес, сондықтан билік пен азаматтардың нақты күш-жігерін қажет етеді», - деді Ирен Чараламбидес.

Бұған дейін ЕҚЫҰ-ның сайлауды бақылау жөніндегі миссиясының аралық есебінде «сайлау елде басталған бірқатар реформалар аясында өтіп жатыр» делінген болатын.

«Демократиялық институттар және адам құқықтары бюросы Сайлауды қадағалау миссиясының сұхбаттасушыларының көпшілігі реформаларды құптады, олар ДИАҚБ-ның алдыңғы бірнеше ұсыныстарын, соның ішінде сайлау шегін төмендетуді, өзін-өзі ұсынған кандидаттарға үміткер болуға мүмкіндік беретін тікелей дауыс беру арқылы толық сайланған мәжілісті енгізуді, сондай-ақ партияларды тіркеу талаптарын жеңілдетуді қарастырды», - делінген миссия есебінде.

Сондай-ақ, Сайлауды қадағалау миссиясының ДИАҚБ барлық сұхбаттасушылары саяси партияларды тіркеуге қойылатын талаптардың өзгеруіне «оң баға берді».