Ақтөбе облысында ауыл тұрғынынан 76 ақбөкен мүйізі тәркіленді
Күдікті 5 жылға дейін бас бостандығынан айырылуы мүмкін
Ембі полиция бөлімінің қызметкерлері «Охотзоопром» ММ қызметкерлерімен бірлесіп, Мұғалжар ауданының 34 жастағы тұрғынын ұстады. Тексеру кезінде ауыл тұрғынынан полиция қызметкерлері рюкзактағы 76 ақбөкен мүйізін тауып, тәркіледі, деп хабарлайды Azattyq Rýhy ҚР ІІМ баспасөз қызметіне сілтеме жасап.
ҚР ҚК-нің 339-бабы 1-1-бөлігі «Өсiмдiктердің немесе жануарлардың сирек кездесетiн және құрып кету қаупi төнген, сондай-ақ пайдалануға тыйым салынған түрлерімен, олардың бөліктерімен немесе дериваттарымен заңсыз айналысу» бойынша сотқа дейінгі тергеп-тексеру басталды. Тәркіленген мүйіздер бойынша сараптама тағайындалды.
Баптың санкциясы үш жылдан бес жылға дейінгі мерзімге бас бостандығын шектеу түріндегі жазаны не мүлкі тәркіленіп, сол мерзімге бас бостандығынан айыруды көздейді.
