«Жұмыс істегілерің келмесе, кетіңдер». Қызылордада 100-ге жуық теміржолшы жұмыссыз қалды

Қызылордада басшылықтан жалақыны көтеруді талап еткен вагон депосының 100-ге жуық қызметкері жұмыссыз қалды, деп хабарлайды Azattyq Ruhy Stan.kz ақпарат агенттігіне сілтеме жасап.

Жұмыссыз қалған халық журналистерді шақырып, өз мәселелерін айтты. Жұмысшылардың айтуынша, зауытта 200-ге жуық адам жұмыс істейді.

«Бүгін Алматыдан келген ЖШС президенті «Жұмыс істегілерің келмесе, кетіңдер» деп жалақыны көтеруді талап еткен бәрімізді жұмыстан қуып жіберді де, қақпаны жауып тастады. Сондықтан біз журналистерді шақырдық. Жалақыны көтерсін, жұмысқа материалды уақытында берсін. Бізге 250 мың теңге жетеді, артық керегі жоқ», - деді жұмысшылар атынан электрик Сәбит Өмірзақов.

Жұмысшылар вагон депосындағы еңбек жағдайы жылдан жылға нашарлап бара жатқанын айтты. Олар жалақыны көтермейді, демалыста толық демалуға мүмкіндік бермейді. Сонымен қатар, олардың айтуынша, вагондарды жөндеуге қажетті материал да уақытында жеткізілмейді.

«2019 жылдан бері ол бізді сатып алғаннан бері, біз заңды демалыс күндерін қалыпты түрде ала алмаймыз, бірінші жылы 9 күн, екінші жылы 15 күн берді, ал қалған күндеріне ақша бермейді. Олар бізді демалыс күндері де жұмыс істеуге мәжбүрлейді, жұмыс істегілерің келмесе, кетіңдер дейді басшылық», - деп қосты ол.

Кешкі сағат 18:00-ге таяп қалғанда жұмысшылар әкімдік, прокуратура, құқық қорғау органдарының қызметкерлері келгенін, бірақ серіктестік басшылығы қақпасын ашпағанын хабарлады.