Алматыда соңғы бір жылда 3 түрлі ауруға шалдыққан оқушылар саны үш есеге көбейген

Алматылық мектеп оқушыларының арасында омыртқасы қисаю, жүйке жүйесінің бұзылуы, сондай-ақ көздің нашарлауы сияқты аурулар соңғы бір жылдың ішінде үш есеге көбейіп кеткен, деп хабарлайды Azattyq Ruhy.

Алматы қаласы санитарлық-эпидемиологиялық бақылау департаментінің білім беру және тәрбие объектілерін бақылау және қадағалау саласы бойынша аудандық басқармалары 2022 жылы оқушылардың тереңдетілген профилактикалық тексерулерінің нәтижесінде келесілер анықталды: медициналық тексеруге жататын 149 351 оқушының 136 568 немесе 91,4% тексерілген (2021жылы-81,8%), 26 892 оқушыда немесе 19,6%-да патология анықталды.

Жалпы білім беретін мектеп оқушыларын медициналық тексеру нәтижелері бойынша:

• 2440 оқушыда немесе 1,7% сколиоз ауруы анықталды (2021 жылы - 589);
• орталық жүйке жүйесі бұзылуы – 2475 оқушыда немесе 1,8% анықталды (2021 жылы - 443);
• көру мүшелерінің патологиясы маңызды орын алады – 8506 оқушыда немесе 6,2% (2021 жылы - 2701).

Оқушылар бастауыш сыныптардан жоғары сыныптарға ауысқан сайын осы патологиясы бар балалардың саны артып келе жатқандығына назар аударылады.

«Мысалы, мектептегі оқушылардың негізгі контингенті арасында, яғни 5,6,7,8,9 сынып оқушыларын қамтитын орта буын арасында - 39,5%-ды құраса (3360 оқушы), жоғары буын оқушылары арасында таралуы (10-11 сыныптар) – 37% (3148), бастауыш сынып оқушылары арасында - 23,5%-ды (1998 оқушы) құрайды.

Оқушыларда анықталған патологиялардың негізгі себептері жақын қашықтықтағы көру жұмысының жоғарылауы немесе бейімделу кернеуі, оқу жүктемесінің артуы және т.б.», - дейді департамент өкілдері.

Оңтүстік мегаполистің санитариялық дәрігерлері жоғарыда аталған патологиялардың пайда болуының алдын алудың маңызды факторлары келесілер болып табылатынын еске салады:

• табиғи және жасанды жарық деңгейінің жеткіліктілігі;
• оқушылардың дұрыс орналасуы және өсуге сәйкес келетін ыңғайлы жиһазды пайдалану;
• санитариялық нормалар мен ережелерге сәйкес келетін безендіруі, сапасы жақсы оқулықтар мен кітаптарды пайдалану;
• оқушылардың сабақтарын демалыспен кезектестіру, дене шынықтыру минуттарын мезгіл-мезгіл өткізу;
• балалар және жасөспірімдердің белсенді үйлесімді физикалық дамуы;
• рационалды тамақтану және витаминдеуді ұйымдастыру;
• таза ауада жүйелі серуендер мен ойындар өткізу.