Еуропалық Одақ Минскіге қарсы санкцияларды күшейтпек
Ауылшаруашылық тауарлары, азық-түлік және дәрі-дәрмектер әлі санкциялар тізіміне енбеді
Еуропалық Одақ Украинаға қарсы соғысқа қатысқаны үшін Беларуське қарсы жаңа санкциялар пакетін енгізуді ұсынды. Шектеулер Ресейге салынған санкциямен бірдей болуы мүмкін, деп хабарлайды Azattyq Ruhy Bloomberg-ке сілтеме жасап.
Егер мұндай ұсыныс еуропалық саясаткерлер арасында қолдау тапса, Беларусь Ресей Федерациясына қойылған көптеген шектеуге, соның ішінде елдің негізгі технологиялары мен энергетикалық секторына қатысты санкцияға тап болады.
Атап айтқанда, ұсынылған санкциялар мыналарға қолданылады:
- Қос мақсаттағы тауарларды экспорттау және әскери мақсатта қолданылатын технологиялар;
- Мұнай, көмір, болат және алтын;
- Сәнді заттар, инвестициялар және белгілі бір қызметтерді ұсыну;
- Шектеулер авиацияға, энергетикаға және негізгі табыс көздеріне де әсер етеді.
Ресей Федерациясына салынған санкциялар сияқты, медициналық тауарларға, ауылшаруашылық және азық - түлік өнімдеріне де ерекшеліктер қарастырылған.
Заң ЕО-ға Беларусьтің жеке және заңды тұлғаларына салынған санкцияларды айналып өтуге көмектесетін кез келген адамды қудалауға мүмкіндік береді.
Санкцияларды бекіту үшін ЕО-ның барлық елінің дауысы қажет. Еуропада Ресейге қатысты оныншы санкциялар пакеті мен ресейлік мұнай өнімдеріне баға шектеулері дайындалып жатыр.
