Иран билігі бельгиялық азаматты 40 жылға соттады
Гуманитарлық миссиялардың қызметкері оған тағылған айыптарды үзілді-кесілді жоққа шығарады
Иран билігі елде гуманитарлық көмек көрсетуді ұйымдастырумен айналысып келген Бельгия азаматы, 41 жастағы Оливье Вандекастилді 40 жылға бас бостандығынан айырды және 74 рет қамшымен ұрғызды. Ол тыңшылық жасады, АҚШ-тың Иранға қарсы жұмыс істеуін ұйымдастырды және валюта контрабандасына араласты әрі ақша жымқырды деп айыпталған. Бұл туралы Reuters агенттігі Иранның Tasnim ақпарат агенттігіне сілтеме жасап жариялады, деп хабарлайды Azattyq Ruhy.
Вандекастил Иран билігінің оған таққан барлық айыбын жоққа шығарды. Оны 2022 жылдың ақпанында Ислам революциясының қамқоршылар корпусының қызметкерлері тұтқындады. BBC мәліметтері бойынша, Оливье Вандекастил бұрын Иранда Норвегияның босқындар кеңесінің, сондай-ақ басқа агенттіктердің филиалының директоры болып жұмыс істеген. Сондай-ақ Ауғанстан қауымдастығымен тығыз байланыста болған. Ол Иранда 5 жылдан астам уақыт тұрған.
Бельгияның Әділет министрі Винсент Ван Куикенборн желтоқсан айында Вандекастилдің «ойдан шығарылған қылмыстар сериясы үшін» түрмеде отырғанын және Иранда 2021 жылы Иран дипломаты Асадол Асади шығарған Бельгия сотының шешімі үшін қамауға алынып, сотталғанын мәлімдеді. Соңғысы терроризм айыптары бойынша кінәлі деп танылды.
Айта кетейік,соңғы жылдары Иранда шетелдіктер мен қос азаматтығы бар адамдарды тыңшылық және басқа да мемлекеттік қауіпсіздікті бұзды деген айыппен қамауға алу, жабық сот процестерінде үкім шығару, тиісті құқықтық рәсімдерді бұзу жағдайлары жиілеп кеткен.
