Ақтөбеде 1 млрд теңгеден астам салықты төлеуден жалтарған компания басшысы сотталды
Сот оны 4 жылға бас бостандығынан айырды
Экономикалық тергеу департаменті «Ақтөбеэлектросетьстрой» ЖШС директоры Болат Көшкеновті 2015-2017 жылдар аралығында 1 миллиард 491 миллион теңге салық төлемеді деп айыптады, деп хабарлайды Azattyq Rýhy «Диапазон» басылымына сілтеме жасап.
Басылымның жазуынша, айыпталушы кірістер мен шығыстар туралы декларацияға бұрмаланған деректерді енгізген, шот-фактураларды жұмыстарды нақты орындамай пайдаланған.
Алайда сотталушының өзі кінәсін мойындаған жоқ. Ол мемлекеттік сатып алумен жұмыс істегенін, қосалқы мердігерлердің қызметіне жүгінгенін, жалған шот-фактураларды пайдаланбағанын алға тартты. Айыпталушы соттан адвокаттың барлық дәлелдерін тексеруді сұрады.
Бірақ сот ақтау айғақтарына сенбеді және айыпталушы салық төлемегені үшін кінәлі деп танылды. Сот Болат Көшкеновті 4 жылға бас бостандығынан айырды. Сотталған адам үкім шыққаннан кейін бірден қамауға алынды. Сондай-ақ, сот оны мемлекетке 1 миллиард 491 миллион теңге шығын өтеуге міндеттеді. Үкім заңды күшіне енген жоқ.
