Маңғыстауда Қаракөл көлінде өлген аққулардан құс тұмауы анықталды

Маңғыстауда Қаракөл көлінде өлген аққулардан құс тұмауы анықталды, деп хабарлайды Azattyq Ruhy Қазақстан ұлттық телеарнасына сілтеме жасап.

Осыдан 3 күн бұрын Ақтаудан 20 шақырым жердегі су қоймасынан 10 аққудың өлексесі табылған болатын. Биологиялық материалдар Астанадағы ұлттық зерттеу орталығына жіберілген еді. Енді өңірде үй құстарын жаппай егу жұмыстары жүргізілмек. Ол үшін 18 мыңнан астам доза вакцина алынды.

«Орталықтан бізге нәтижесі келді. Құс тұмауы анықталды деп. Бұл енді Аққулар ұшып келіп жатыр ғой, жан-жақтан ұшып келіп жатқан кезең, Маңғыстауда қонады да ары қарай кете береді ғой жылы жаққа. Ол нақты қай жерден шыққанын енді біз айта алмаймыз»,- деді облыстық аумақтық Ветеринарлық инспекциясы басшысының орынбасары Жақанбек Дуанаев.