«Қоянқұс ауылының 50-ден аса үйі газсыз қалды»: әкімдік түсініктеме берді

Іле ауданының Байсерке ауылдық округіне қарасты Қоянқұс ауылының 50-ден аса үйі газсыз қалды. Жағдайға байланысты Алматы облысының әкімдігі түсініктеме берді, деп хабарлайды Azattyq Ruhy тілшісі.

«Бұл үйлерге берілетін желі жеке инвестордың құбыры. Мердігер өз күшімен мәселені шеше алмаған соң аудандық һәм облыстық газ жұмысшыларын жұмылдырдық. Облыс әкімінің тапсырмасына сәйкес аудан әкімі Бағдат Қарасаев бұл мәселені жеке қадағалауына алып, жұмыстың басында тұрды. Сонымен қатар, тұрғындармен түсіндірме жұмысын жүргізді. Облыс әкімдігіне түскен қоңыраудан кейін мәселе бір сағаттың ішінде шешімін тапты», - деді Алматы облысы әкімінің баспасөз хатшысы Ғалымұрат Жүкел.

Сондай-ақ ақау себептерін анықтау үшін жұмысшы топ құрылды. Облыс тұрғындары газдан ақау шықса 87079294040 нөміріне хабарлассуы қажет.

Айта кетейік, Іле ауданына қарасты Қоянқұс ауылында бір күн газ болмай қалған. Қыстың суығында тоңып, тіптен ас дайындап ішуден қалған тұрғындарға әкімдіктен дер кезінде ешкім жауап та бермей қойған.