«Ақтөбе жастары» ипотекалық бағдарламасы іске қосылады

Бүгін Астанада «Investment Aktobe 2022» тақырыбында VII Халықаралық инвестициялық форумы өтті. Халықаралық деңгейдегі шараның мақсаты – Ақтөбе облысының инвестициялық әлеуетін көрсете отырып, өңірдің имиджін әрі қарай дамытудың тиімді жолдарын қарастыру, облысқа тартылатын шетелдік инвестиция көлемін арттыру.

Форумның ашылу салтанатында сөз сөйлеген облыс әкімі Ералы Тоғжанов өз баяндамасында «Ашық есік» саясатын ұстанатынын айтып, инвесторлар алдындағы міндеттемелерді толық орындауға дайын екенін мәлімдеді.

«Мемлекет басшысы Қазақстан халқына жолдауында «Саяси және экономикалық реформалар ең алдымен әрбір қазақстандықтың табысын арттыруға, өмір сүру сапасын жақсартуға бағытталатынын атап өтті. Мұны мемлекет пен бизнестің бірігуінсіз орындау мүмкін емес» деген еді. Расында жаңа жұмыс орындарынсыз, капитал салымдарынсыз, еңбек өнімділігін арттырусыз жүзеге асыру мүмкін емес. Мұның барлығы сайып келгенде инвестицияға тіреледі», - деді Ералы Тоғжанов.

Шара барысында Ақтөбе облысы әкімдігі «Отбасы банк» АҚ-мен жастарға арналған ипотекалық бағдарламаны жүзеге асыру бойынша келісімге қол қойды. Ендігі ретте өңірдің жас азаматтары үшін тұрғын үй алу мақсатында «Ақтөбе жастары» жобасы аясында жеңілдетілген заемға қол жеткізе алады. 

«Бүгін біз Ақтөбе облысында «Ақтөбе жастары» бағдарламасын бастау туралы меморандумға қол қойдық. Бұл - тұрғын үйі жоқ, бірақ Ақтөбе облысының кәсіпорындарында жұмыс істейтін 35 жасқа дейінгі жас азаматтарға арналған арнайы бағдарлама. Олардың кем дегенде бір жылдық жұмыс өтілі болуы керек. Мұндағы мақсат – сол жерде жұмыс істейтін жастардың тиімді жолмен баспаналы болуына мүмкіндік бере отырып, туған жерінде жұмысын жалғастыруына ықпал ету. «Ақтөбе жастары» бағдарламасына 600 млн теңге қарастырылып отыр. Жалпы қазір Қазақстанда шамамен 3 млн адам 29-39 жас аралығында, әдетте дәл осы жастағылардың тұтынушылық белсенділігі басым болып келеді. Сондай-ақ, егер ипотека 18-19 жыл мерзімге алынса, онда бұл тұрғын үй мәселелерін шешудегі ең қолайлы жас», - деді «Отбасы банк» АҚ Басқарма Төрайымы Ләззат Ибрагимова.

Айта кетерлігі, дәл осындай жоба қазір еліміздің оншақты өңірінде бар. Атап айтсақ: Алматы, Астана қалаларында, Алматы, Атырау, Қарағанды, Қостанай, Жамбыл облыстарында және БҚО-да жұмыс істеп тұр. Дәл осындай бағдарлама Жетісу мен Абай облыстарында да іске қосылады деп күтілуде.

Облыс әкімдіктері мен Отбасы банкінің жастарды несиелендіруге бағыттаған ортақ бюджеті қазірдің өзінде 60 млрд теңгеден асып түскен.

«Қазір мәслихаттар өрт сөндірушілерді тұрғын үймен қамтамасыз ету мәселесін көтеруде. Мысалы, Абай облысы өрт сөндірушілерге арнайы микробағдарламаны қаржыландыруға 90 млн теңге жеке бюджет бөлді. Ал өзге аймақтардағы өрт сөндірушілер жастар бағдарламалары аясында басымдыққа ие топқа кіретін болады. Жыл соңына дейін Павлодар, Түркістан, Қызылорда облыстары және Шымкент қаласынан жақсы жаңалықтар күтеміз. БҚО әкімдігі 1 млрд теңге бөлетіні туралы жариялады. Қазір бұл сұранысқа ие бағдарлама болғандықтан, жекелеген аудан әкімдіктері жеке бюджет бөле бастағанын атап өткім келеді. Мысалы, БҚО Бөрлі ауданының әкімдігі жастардың баспаналы болуы үшін және ауданда жастарды қалдыру үшін бөлек бюджет бөлді», - деді Ләззат Ибрагимова.

«Ақтөбе жастары» бағдарламасы 35 жасқа дейінгі облыс тұрғындарына барынша тиімді шарттармен баспана сатып алуға көмектеседі. Оған дәрігерлер, мұғалімдер, мәдениет және спорт қызметкерлері, жоғары оқу орындарының мұғалімдері, ғылыми-зерттеу институттарының ғылыми қызметкерлері, журналистер, әлеуметтік сала, мемлекеттік және коммуналдық кәсіпорын қызметкерлері, сондай-ақ ТЖД қызметкерлері мен ауылшаруашылығы саласының өкілдері қатыса алады.

Бағдарлама бойынша әлеуетті несие алушылардың тізімін жергілікті әкімдік қалыптастырады. Өтініштердің қалай қабылданаты және байқау кезеңі әкімдікпен қосымша хабарландырылады.

Қатысушылар пулы құрылғаннан кейін, олардың барлығы Отбасы банкінен несие алуға жолдама алады. Үміткерлер өздерінің төлем қабілеттілігін растап, жылдық 5 пайызбен заем ала алады. Мұнда алғашқы жарна 10% ғана болады. Бағдарлама қатысушыларына берілетін несиенің ең жоғары сомасы – 15 млн теңге. Баспананы алғашқы немесе қайталама нарықтан сатып алуға болады.