Батыс Қазақстан облысында «Үздік мектеп Президенті» сырттай байқауының жеңімпазы белгілі болды

Батыс Қазақстан облысында «Мектеп парламенті» өзін-өзі басқару ұйымдары арасындағы «Үздік мектеп Президенті» облыстық сырттай байқауының нәтижесі жарияланды, деп хабарлайды Azattyq Ruhy тілшісі.

«Үздік мектеп Президенті» байқауы облыстық білім басқармасының бұйрығы негізінде ұйымдастырылды. Байқау Қазақстан Республикасының «Білімді ұлт» сапалы білім беру» ұлттық жобасына сәйкес, білім алушылардың бойындағы азаматтық жауапкершілік дағдыларын дамыту, қоғам мен мемлекетті жетілдіру мүддесінде әрекет ете алатын қабілетті және көшбасшылық қасиеттері жоғары мектеп Президенттерін анықтау, қолдау көрсету үшін өткізілді.

«Үздік мектеп Президенті» байқауына аудан, облыс және Орал қаласынан жалпы білім беретін мектептердің 8-11-сынып окушылары қатысты. Сырттай байқау «Бір мақсат, бір мүдде, бір болашақ» - Мектеп Президентінің бағдарламасы, «Мектеп Президентінің бір күні» - бейнеролик, «Кемел келешектің көшбасшылары» - «Мектеп парламенті» тарапынан 2021-2022 және 2022-2023 оқу жылдары іске асырылған үздік жоба бағыттары бойынша ұйымдастырылды. Байқау барысында аудандық, қалалық кезеңдері жеңімпаздарының жұмыстарын қазылар алқасы қарап, ережеге сәйкес облыстық кезеңнің бір жеңімпазын анықтады.

Сонымен «Үздік мектеп Президенті» байқауының қорытындысы бойынша ІІІ дәрежелі дипломмен Бөрілі ауданында орналасқан №3 жалпы орта білім беретін мектебінің 10-сынып оқушысы Рүстем Аманов, Тасқала ауданында орналасқан С.Жақығұлов атындағы жалпы орта білім беретін мектебінің 10-сынып оқушысы Диана Дәулетова, Ақжайық ауданындағы Абай атындағы мектеп-гимназиясының 10-сынып оқушысы Назгерім Сәкенқызы марапатталды.

Байқаудың қорытындысына сәйкес ІІ дәрежелі диплом Орал қаласында орналасқан дарынды балаларға арналған С.Сейфуллин атындағы №11 облыстық мамандандырылған мектеп-лицей-интернатының 10-сыныбында білім алып жүрген оқушы Асан Абхиевке, Бәйтерек ауданында орналасқан Абай атындағы мектеп-гимназия-интернатының 10-сынып оқушысы Сабинаға бұйырды.

Ал байқауда І орынды Орал қаласындағы №33 жалпы орта білім беретін мектебінің 10-сынып оқушысы Айнара Темірханова иеленді.