«Жастар Рухы» жастар қанатының волонтерлері зардап шеккен екібастұздықтарға көмектесуде

Azattyq Rýhy

Екібастұзға барлығы 120-дан астам ерікті барды

«Жастар Рухы» жастар қанатының волонтерлері зардап шеккен екібастұздықтарға көмектесуде

«AMANAT» партиясының «Жастар Рухы» жастар қанатының волонтерлері Екібастұз қаласының жылусыз қалған тұрғындарына гуманитарлық көмекті тарату жұмысына жұмылдырылды, деп хабарлайды Azattyq Ruhy.

Екібастұзда жастар қанатының волонтерлер штабы тұрғындарға көмек көрсетуді жалғастырып жатыр. «Жастар Рухының» белсенділері үй-үйді аралап, жалғыз тұрып жатқан зейнеткерлер, мүгедектер, мұқтаж отбасылар туралы ақпарат жинауда.

Жастар қанатының волонтерлері апаттан құтқарушы бригадаларға ыстық тамақ ұйымдастыру жұмысымен де айналысып жүр.

«Жастар Рухы» жастар қанатының төрағасы Нұржан Жетпісбаев Екібастұзға барлығы 120-дан астам ерікті келгенін атап өтті. Оның ішінде 30 адам Астанадан келді.

«Еріктілеріміз мұқтаж жандарға көрпе, термос және басқа да қажетті заттарды таратып жатыр. Бүгін түнде 1000 жаңа электр жылытқыш тиелген жүк түсірдік. Бұл заттар әсіресе көпбалалы және аз қамтылған отбасыларға, ерекше қажеттілігі бар адамдарға, зейнеткерлерге қажет. Екібастұз қаласының барша тұрғынына жағдай қалыпқа келгенге дейін көмек көрсетеміз. Мұндай жағдайда сырттан бақылап отыру мүмкін емес. Дәл осындай сәтте ынтымақ пен бірлігімізді танытуымыз керек», – деді ол.

«Жастар Рухының» мүшесі Камил Байрамовтың былай дейді: «Қайғы-қасіретті өзімдікі немесе өзгенікі деп ешкім бөліп-жармайды. Осынау қиын-қыстау сәтте «Жастар Рухының» белсенділері Екібастұз қаласының тұрғындарына қол ұшын созып жатыр. Олар бір кездері Әулиекөлде, Мақтаарал мен Арыста зардап шеккен халыққа да бәл осылай көмек көрсеткен еді».

«Жастар Рухының» белсендісі Арсланбек Мағзұм тұрғындар мұндай жағдайда көмекке жүгінуі тиіс деп санайды.

«Волонтерлер штабында жылы киім-кешекті, суды, басқа да қажетті тауарларды қай мекенжайға апару керектігі туралы өтінімдер сараланады. Бізге жылусыз қалған әрбір тұрғынға, әрбір отбасыға көмек көрсетілгені маңызды», – деді ол.

×
Бұл желілік ресурстың ақпараттық өнімдері 18 жастан асқан адамдарға арналған.