«Азаматтық белсенділік сәнге айналып келеді»: Талғат Қалиев дауыс берудің қарқыны жайлы

Қолданбалы этносаяси зерттеулер институтының директоры Талғат Қалиев дауыс берушілердің қарқыны туралы айтты, деп хабарлады Azattyq Ruhy.

«Бүгінгі сайлауға қатысушылардың қарасы әдеттегіден жоғары екенін байқауға болады. Мысалы, мен өзім дауыс беруге сағат 12:00-ден кейін бардым. Мен үнемі солай дауыс беремін. Себебі байқаушылармен келушілердің қарқыны жайлы әңгімелесе аламын. Сайлаушылардың келуі туралы мәліметтер екі сағат сайын есептеледі. 12:00-де жалпы картинаны бағамдауға болады. Сағат 10:00-дің кезінде сайлаушылардың 10 пайызы келіп дауыс берді. Бұл – өте жоғары көрсеткіш. Мен келгенде жастар өте көп болды. Бәрінің көңіл күйі жақсы, мерекелік күйде деп те айтуға болады», - дейді Қалиев.

Институт директорының айтуынша, бұл – қазақстандықтардың сайлаумен байланыстыратын сенімінің көрсеткіші.

«Әлеуметтік желіде көпшілік дауыс беруге барғанын жариялап жатыр. Бұл да азаматтық белсенділік таныту сәнге айналып бара жатқанын көрсетеді. Яғни, оны сау тренд деп атауға болады. Адамдар сайлауға қатысқанын мақтан тұтады. Бұл да болашақ президентке үлкен жауапкершілік жүктейді. Себебі ол президентке деген алдағы мерзімде қазақстандықтардың артып отырған үміті», - деді Талғат Қалиев.