Бірі жарымен, енді бірі баласымен барған: Қазақстанда шенеуніктер сайлауға қалай қатысып жатыр

Бүгін, 20 қараша күні кезектен тыс президент сайлауы өтіп жатыр. Ал оған қатысып, дауыс берген шенеуніктер сайлау учаскесінде түскен суреттерін желіге жүктеп жатыр. Azattyq Ruhy тілшісі министрлердің қайда және кіммен барып дауыс бергенін білді.

Цифрлық даму және инновациялар министрі Бағдат Мусин сайлауға кішкентай баласы мен әйелін  ертіп барған. Өзге министрлерден қарағанда, бейресми суретін, яғни келіншегі мен баласының селфиін салған.

«Бүгінгі таңымыз азаматтық борышымызды өтеуден басталды. Кішкентайымызбен бірге сайлау учаскесіне барып, еліміздің болашағы үшін дауыс бердік», - деп жазды Бағдат Мусин.

Ғылым және жоғарғы білім министрі Саясат Нұрбек те дауыс беруге жалғыз бармаған. Ол жарымен бірге түске суретін жариялай отырып, азаматтарды белсенді болуға шақырды.

«Бүгін ел қатарлы сайлау учаскесіне барып, жұбайым екеуміз дауыс бердік. Ел ертеңі үшін өз таңдауымызды жасадық. Себебі сайлауда әркімнің дауысы маңызды деп есептеймін. Туған еліміз – Қазақстанымыздың ішкі мәселелерін сырттан ешкім шешпейтінін, мемлекетімізді бізден басқа ешкім дамыта алмайтынын мойындайық. Барлығы өз қолымызда. Өз елінің саналы, кемел, белсенді азаматы болу – нағыз патриотизмнің көрсеткіші. Бұл – үлкен жауапкершілік», - дейді министр.

«Отбасымызбен бірге дауыс бердік» деген Оқу-ағарту министрі Асхат Аймағамбетов жалғыз түскен суретін салған. Ол өз әріптестерін, яғни педагогтер мен студенттерді дауыс беруге шақырып отыр.

«Бүгін таңертең отбасымызбен бірге азаматтық борышымызды орындап, әділетті мемлекет үшін, Отанымыз – Қазақстанның болашағы үшін дауыс бердік. Педагогтер мен білім саласының басқа да қызметкерлерін, студенттерді және барлық отандасымды сайлау учаскелеріне барып, өз елі, өз қаласы және отбасы үшін таңдау жасауға шақырамын», - дейді Аймағамбетов.

Қорғаныс министрі Руслан Жақсылықов демалыс күні екеніне қарамастан жұмыста жүргендей. Ол Астана қаласындағы сайлау участогының біріне алғашқылардың бірі болып қызметтік формасымен барып, дауыс берген.

«Қазіргі уақытта әскери бөлімдер мен мекемелер аумағындағы 20 сайлау учаскесінде мерзімді қызметтегі сарбаздар мен курсанттар дауыс беріп жатыр. Қарулы күштерден барлығы 130 мыңға жуық әскери қызметші, азаматтық персонал және олардың отбасы мүшелері дауыс беруге қатысуда», – деді Жақсылықов.

Денсаулық сақтау министрі Ажар Ғиният та біраз әріптестері сияқты ерте барып дауыс берген. Суретіне және суретінің астындағы жазбасына қарап, министрдің көңіл-күйі тамаша екенін байқауға болады. 

«Бүгін ерте көтеріңкі көңіл-күймен ел болашағы үшін Қазақстан Республикасы Президенттігіне жалғыз кандидатқа дауыс бердім. Президент сайлауында әрқайсымыздың саналы дауысымыз маңызды», - дейді Ажар Ғиният.