«Алматы Жастары» бағдарламасы бойынша қате толтырылған өтініштер конкурсқа қайта жолданып, нәтижесі шықты

Алматы қаласы әкімдігі 2022 жылғы 10-14 қазан аралығында www.almaty-zhastary.kz сайты арқылы «Алматы жастары» қалалық жеңілдікпен несиелендіру бағдарламасына қатысу үшін өтінімдерді қосымша іріктеуді жүзеге асырған. Деректерді қате толтырған 2 мыңнан астам азамат қайта өтініш толтыруды аяқтады, деп хабарлайды Azattyq Ruhy.

Бағдарламаға ағымдағы жылдың негізгі конкурстық іріктеу кезеңінде (2022 жылғы 18 мамырдан 1 маусымға дейін) өтінім берген, бірақ құжаттардың дұрыс толтырылмауына/рәсімделмеуіне/берілмеуіне байланысты өтпеген өтініш берушілер ғана қатысты. 

"Өтініштер мен құжаттарды қабылдау қорытындысы бойынша 2135 қатысушы өз өтінімдерін редакциялады және құжаттарын жаңартты.

Барлық келіп түскен өтініштер мен құжаттардың Бағдарлама талаптарына сәйкестігі тексерілді және әр сала бойынша ең көп жинаған баллдар саны бойынша тізім қалыптастырылды. 

Іріктелген қатысушылардың тізімі, резервке енгізілген және қабылданбаған қатысушылардың тізімдері өтінімдерді қабылдау www.almaty-zhastary.kz сайтында орналастырылған.

Іріктелген 183 үміткерлерге сайттағы жеке кабинетке «Отбасы банк» АҚ төлем қабілеттілігін растау үшін жолдама берілді", - деп мәлімдеді Алматы қаласы коммуналдық инфрақұрылымды дамыту басқармасы. 

Еске салсақ, осы Бағдарлама аясында кемінде 1000 несие беру жоспарланған. Бүгінде Бағдарлама бойынша 829 қатысушы баспаналы болды, тағы 27 қатысушы баспана іздеп жатыр.