СҚО-да тұмау жұқтырған 19 адам тіркелді

Солтүстік Қазақстанда соңғы екі аптада тұмау жұқтырған 19 адам тіркелді. Олардың басым бөлігі 14 жасқа дейінгі балалар, деп хабарлайды Azattyq Ruhy тілшісі.

Биылғы эпидемиологиялық маусымда ЖРВИ-ге шалдыққан 4 839 адам емделіп шықты. Көрсеткіш өткен жылдың сәйкес мерзімімен салыстырғанда 5 пайызға төмен. 

«Қазіргі уақытта тұмауды алдын алудың тиімді әдістерінің бірі-вакцинация. Жұқпаға қарсы екпе - аурудың асқынуынуының алдын алады. 3 қазаннан облыста тұмауға қарсы иммундау науқаны басталды. Қауіп тобына жататын адамдарға тіркелген жері бойынша емханада тегін епе жасалады. Медицина қызметкерлері, медициналық ұйымда диспансерлік есепте тұрған балалар, сәбилер, балалар үйлерінің тәрбиеленушілері, қарттар үйлерінің контингенті, эпидемиологиялық көрсеткіштер бойынша жүктілігі 2-3-ші триместрдегі  әйелдер, созылмалы аурулары бар адамдар, 65 жастан асқан зейнеткерлер қамтылады», - дейді СҚО санитариялық-эпидемиологиялық бақылау департаментінің бас маманы Айнаш Сағандықова.  

Мамандардың айтуынша, А типті (H1N1, H3N2) және В типті тұмаудан қорғайтын ресейлік үш валентті «Гриппол плюс» вакцинасы қолданылады. Жыл басынан облыста 47 639 адам вакцина алды. 

«Тұмауға қарсы вакцинациямен қамту ұжымдық иммунитетті қалыптастырады және эпидемияның пайда болуына жол бермейді. Профилактиканы назардан тыс қалдырмау керек: бетперде кию, әлеуметтік қашықтықты сақтау, мүмкіндігінше адамдар көп жиналатын жерлерге бармау, жеке гигиена ережелерін бұзбу қажет. Сонымен қатар, иммунитетті барлық қолжетімді тәсілдермен көтеру керек. Жұмыс және демалыс режимін сақтау, жеткілікті ұйқы, микроэлементтер мен дәрумендердің, әсіресе «С» витаминінің, сарымсақ пен пияздың жеткілікті мөлшері бар тамақ жеуге кеңес береміз. Ауырып қалған жағдайда үйде болу керек, дәрігерді шақырып, инфекцияның одан әрі таралуын болдырмау үшін балабақшаға, мектепке бармау керек», - дейді  СҚО санитариялық-эпидемиологиялық бақылау департаментінің инфекциялық және паразиттік ауруларды эпидемиологиялық қадағалау бөлімінің басшысы Салтанат Миргалимова.