Нью-Йорк мэрі желідегі парақшасында «Ерке сылқым» күйінің видеосын жариялады

АҚШ-тағы Нью-Йорк қаласының мэрі Эрик Адамс Instagram әлеуметтік желісіндегі парақшасында «Ерке сылқым» күйінің видеосын жариялады, деп хабарлайды Azattyq Ruhy.

«Қазақстанның тәуелсіздігін тойлау үшін олардың туын көтергенде, Нью-Йорк тұрғындарының да жігері мен рухын көтереміз. Біз туған қаламыздың алуан түрлі сұлулығын әлемге көрсетеміз. Нью-Йорк деп аталатын ғажайып экспериментке қосқан үлестеріңіз үшін рақмет», - деп жазды Эрик Адамс.

Оқу-ағарту министрі Асхат Аймағамбетовтың айтуынша АҚШ-та қазақтың күйін Назарбаев зияткерлік мектебінің түлегі Жүсіпхан Аманмырза орындаған.

«Мектептердің түлектері бізді өз білімдерімен, халықаралық зияткерлік жарыстардағы жетістіктерімен үнемі қуантып келеді. Сонымен қатар балаларымыздың Отанымыз бен мәдениетімізге деген сүйіспеншілігін көрсететін осындай іс-әрекеттері де ерекше қуаныш, мақтаныш сезімін ұялатады», - деді оқу-ағарту министрі Асхат Аймағамбетов.