Павлодарда жоғалып кеткен бүлдіршін қызметтік иттің көмегімен табылды

Павлодарда жоғалған 4 жасар қыз Ника есімді қызметтік иттің көмегімен табылды, деп хабарлайды Polisia.kz.

24 қыркүйек күні сағат 17.31-де Павлодар полициясына Бөкейхан көшесіндегі үйлердің бірінен 4 жасар қыз жоғалып кеткені туралы хабарлама келіп түсті. Аталған мекенжайға дереу полиция қызметкерлері, сондай-ақ инспектор-кинолог Талғат Әубәкіров Ника атты қызметтік-іздестіру итімен жіберілді.

«Жеке құрам, автопатрульдер мен жаяу нарядтар аттанды. Сонымен қатар көшедегі бейнебақылау камералары тексерілді. Ал қызметтік итке баланың белгілері болатындай заттар берілді. Бірнеше минуттан кейін Ника қызметкерлерді 1-қайық станциясына ертіп апарды, онда қайықтардың бірінен жоғалған қыз табылды. Бала анасына тапсырылды», - деп хабарлады қалалық полиция.

Кішкентай қыздың қайықта жасырынып, жалғыз ойнағаны белгілі болды. Анасының айтуынша, демалыс күндері балалар ата-әжесіне қонаққа барып, төртеуі де үйдің ауласында ойнап жүрген. Сағат 16.45 шамасында әжесі немерелерін компот ішуге шақырғанда 4 жасар немересінен басқасының бәрі келген. 40 минуттай қызды өздері іздегенмен нәтиже бермеген, осыдан кейін барып полицияға жүгініпті.

Айта кету керек, аталмыш қызметтік-іздестіру ит полицияда 2016 жылдан бері қызмет етіп келеді. Ол бір өзі жоғалып кеткен ондаған адамды тапқан. Сондай-ақ бірнеше ұрлық, тонау және кісі өлтіру ісін ашуға көмектесті.