Ақтауда ереуілге шыққан жедел жәрдем қызметкерлері жұмыстан шығарылуы мүмкін
Сот фельдшер мен жүргізушілердің ереуілін заңсыз деп таныды
Ақтауда сот жалақыны көтеруді талап етіп жұмысқа шықпаған жедел жәрдем қызметкерлерінің ереуілі заңсыз екенін ескертті, деп хабарлайды Azattyq Ruhy.
Ақтау қаласында жедел жәрдем қызметкерлері жалақыны және бригада мен фельдшерлердің санын көбейтуді талап етіп, 6 күннен бері жұмысқа шықпаған. Жедел жәрдем қызметінің басшылығы келіссөздер нәтиже бермегеннен кейін сотқа жүгінді.
Істі қараған сот ереуілді заңсыз деп таныды. Өйткені ереуіл ұйымдастырылатыны туралы жұмыс берушіге ресми түрде ескертілмеген. Сонымен қатар сот митинг өтетін орын мен уақыт та белгіленбеген деп түсіндірді.
Ақтау №2 қалалық сотының судьясы Рақымжан Бейсенов ереуілді заңсыз деп тану туралы сот шешімі дереу орындалып, ереуіл тоқтатылуы керектігін жеткізді. Орындалмаған жағдайда жұмыс беруші тәртіптік негізде шара қолдана алады, тіпті келісімшартты бұзуға құқылы.
