Ақсуда құны 12 млрд.теңге болатын жылу қазандығы биыл да іске қосылмайды

Ақсуда құны 12 млрд теңгеге жуықтайтын жылу қазандығы биыл да іске қосылмайды. Себебі, жобада жіберілген қателіктен қажетті құрал жабдықтар жетпей қалған. Бұл туралы Azattyq Ruhy astanatv-ға сілтеме жасап хабарлайды.

Оны көрші елден тапсырыспен ғана алдыруға болады. Ал аймақта жылу маусымының басталуына санаулы күн қалды.

Ақсудағы жылу қазандығының жыры бітер емес. Құрылысы осыдан 5 жыл бұрын басталған нысан әлі толық аяқталған жоқ. Себебі, қажетті жабдықтар жобада дұрыс көрсетілмеген. Соның салдарынан нысан әлі іске қосылмай тұр. Жаңа қазандық 2019 жылы қолданысқа берілуі керек болған. Алайда, түрлі сылтаумен созбалаңға салынып келді.

«Бұл қазандық та біресе, көмір жетпей қалады. Енді біресе, күл үйіндісін шығаратын жабдық жоқ. Сондықтан да қазандық биылда іске қосылмай қалуы мүмкін - деген күмәнді растап отыр. Ал нысанды уақытылы пайдаланылуға бермеген мердігерді жауапкершілікке тартылуы керек», - деді Павлодар облысының әкімі Әбілқайыр Сқақов.

Ал жылу қазандығына жауапты мамандар бір ғана қондырғының жоқтығынан іске қоса алмай отырмыз - деп ақталады.

«Көмір жанғаннан кейін шығатын күлді ұсақтау, 6 қазаншаға 6 агрегат құны төленген. Ол 10 қарашада келеді. Соны орнына орнағаннан кейін сынақ жұмыстарды әрі қарай жалғастырып, сонда осы қазанша дайын болады», - дейді бас сарапшы Дүйсенбай Дүйсенов.

Бұған дейін аймақ атқамінерлері жаңа қазандықпен қаланы толық жылумен қамтуға болады деген. Алайда, ол да мүмкін емес көрінеді.

«Біз 5 қазандықпен түгел қаланы жылыта алмаймыз. Талап бойынша 1 қазандық резервте тұруы керек. Бұл қазандықтың қуаты тек жарты Ақсуды ғана жылытуға жетеді», - деп түсіндірді учаске бастығы Виктор Пусько.

50 мыңға жуық халқы бар шағын шаһар биыл да жылуға жарымайтын түрі бар. Себебі, зауыттағы қазандықтардың әбден тозығы жеткен.

«Қыста суық, өте суық. Білмеймін неше жыл болды обещает. Биыл жылы болады деп. Таки істеген жоқ оны», - деді Ақсу қаласының тұрғыны Әнуар Тершікбаев.

«Жаңа котелныйға біз өте қуанғанбыз жылы болады ғой деп. Қаз сөз жүріп жатыр. Бұл котельный тартпайды, күші жетпейді», - дейді Ақсу қаласының тұрғыны Еркебай Сайдашев.

Қазандықтың құрылысына қыруар қаржы бөлінсе де, жұмыс бітер емес. 5 жыл тұралаған құрылыстың қашан жанданатынын ешкім айта алмайды.