Алматылық полицейлер әскери киім киген алаяқ туралы ескертті
Алаяққа алданған 10 адам полицияға арыз түсірген
Алматы қаласы Наурызбай аудандық полиция басқармасы әскери қызметшілердің атын жамылып алаяқтық қылмыс жасап жүрген адам туралы ескертті, деп хабарлайды Azattyq Ruhy.
«Біздің жедел қызмет бөлімдерінің қызметкерлерінің зерделеуіне сәйкес соңғы уақытта түрлі тұрмыстық заттардың сатылуы жайлы жарнама беріп жүрген әскери формадағы азаматқа алданып қалғандар саны артып келеді. Барлық жағдайда алаяқ өзінің қызмет бабымен басқа қалаға ауысып жатқандығын желеу етіп, тұрмыстық техникамен үй заттарын саудалап, олардан тауар ақшасын толық аударуды сұраған. Сатып алушылар күдігін тудырмас үшін ол өзінің әскери формадағы киімімен түскен суретін, құжаттарын жіберген. Тек қана Алматы қаласының өзінде күдіктіге қатысты 10 арыз-шағым тіркеліп отыр», - деді Алматы қаласы Наурызбай аудандық полиция басқармасының бастығы, полиция полковнигі Данияр Меңдебаев.
Алматы полициясы Волохов Александр Викторович есімді әскери формадағы адамға тап келсеңіз оның алдауына түсіп қалмай, дереу полиция органдарына хабарласуларыңыз керектігін ескертті.
