Таразда той үстінде аспанға оқ атқан ер адам қамауға алынды
Кінәсі дәлелденген жағдайда ол 7 жылға сотталуы мүмкін
Жамбыл облыстық Полиция департаменті аспанға қарудан оқ атқан азаматты ұстады, деп хабарлайды Azattyq Ruhy.
Бұған дейін әлеуметтік желіде полиция қызметкері өз тойында қарудан оқ атты деген ақпарат тараған болатын. Бүгін өңірдің Полиция департаменті оның шындыққа жанаспайтынын мәлімдеді.
«Тергеу барысында оқ атқан азаматтың 28 жастағы уақытша жұмыссыз, Тараз қаласының тұрғыны екендігі анықталып, оның полиция қызметкері еместігі және бұрын ішкі істер органдарында жұмыс жасамағаны белгілі болды», - деді ведомствоның баспасөз қызметі.
Оқ атылған «Сайга» маркалы аңшы мылтығы заң жүзінде осы азаматтың атына тіркелген және 2021 жылдың 1 маусымында оны алып жүруге рұқсат берілген.
«Қазіргі уақытта қару тәркіленіп, сот-баллистикалық сараптамасы тағайындалды. Күдікті сот шешімімен үй қамаққа алынды. Оның кінәсі дәлелденген жағдайда, үш жылдан жеті жылға дейінгі мерзімде бас бостандығынан айыру түріндегі жаза қарастырылғанын хабарлаймыз», - деп көрсетті Жамбыл облыстық Полиция департаменті.
