Қарағандыда жеңіл автомен соғысқан автобус балалар емханасының қоршауын бұзып өтті
Тәртіп сақшылары жол-көлік оқиғасының мән-жайын анықтап жатыр
Қарағанды қаласының Пришахтинск ауданында қоғамдық көлік пен жеңіл авто соқтығысты. Жол-көлік оқиғасы салдарынан автобус балалар емханасының қоршауын бұзып өткен. Бұл туралы облыстық ПД баспасөз қызметі мәлім етті, деп хабарлайды Azattyq Rýhy.
«11 тамыз сағат 9:00-де Қарағандыда 23-ықшам ауданнан 22 ш/а жаққа қарай келе жатқан 26 жастағы жеңіл автокөлік жүргізушісі қарсы қозғалыс жолағына шығып, жолаушылар автобусымен соқтығысқан. Жол-көлік оқиғасы салдарынан автобус медициналық мекеменің қоршауын қағып кетті. Бұл көлік құралының салонында үш жолаушы болған. Олардың бірінің қолы жарақаттанды, оған медициналық көмек көрсетілді», - делінген хабарламада.
Жол-көлік оқиғасының видеосы әлеуметтік желілерде пайда болды. Онда қатты жылдамдықпен келе жатқан жеңіл автокөлік қарсы жолаққа шығып кетіп, жолаушылар автобусымен соқтығысқанын көруге болады. Алдын ала мәліметтер бойынша жеңіл көлік жүргізушісі рөлге ие бола алмай қалған.
Қазіргі уақытта тәртіп сақшылары жол-көлік оқиғасының мән-жайын анықтап жатыр. Тиісті сараптамалар тағайындалды, олардың нәтижелері бойынша іс жүргізу шешімі қабылданады.
