Қазақстанда жылқы еті бір жылда 17 пайызға қымбаттады

Биылғы жылдың шілде айында еліміз базарлары мен дүкендерінде жылқы етінің келісі 2,9 мың теңге болды, бұл бір жыл бұрынғы көрсеткіштен бірден 16,5%-ға қымбат, деп хабарлайды Azattyq Ruhy.

Energyprom зерттеуіне сәйкес, осы жылдың қаңтар-маусым айларында республика бойынша жиынтық салмағы 125 мың тонна жылқы сойылды немесе союға сатылды, бұл өткен жылмен салыстырғанда 6,2 пайызға артық.

«Сондай-ақ осы жылдың 1 шілдесіндегі жағдай бойынша елімізде жылқы саны 4,1 миллионға жетті, бұл бір жыл бұрынғыдан 10,6 пайызға артық. Өңірлік тұрғыда жылқы саны жағынан Түркістан, Қарағанды және Абай облыстары көш бастап тұрды», - дейі сарапшылар.

Жылқы шығыны биыл 5,2 пайызға көбейіп, 2,7 мың басқа жетті. Көбінесе мал өлімі Ақмола, Қостанай және Маңғыстау облыстарында тіркелді.

«Шілдеде еліміз базарлары мен дүкендерінде жылқы етінің келісі 2,9 мың теңге болды, бұл бір жыл бұрынғы көрсеткіштен 16,5 пайызға артық», - делінген зерттеуде.

Бағаның өскенін Солтүстік Қазақстан облысының тұрғындары айрықша сезінді: бір жылда 28,8%-ға өскен. Сондай-ақ Ақтөбе облысы мен Шымкент қаласында жылқы еті біршама қымбаттаған. Ал Қызылорда облысында баға небәрі 4,5%-ға қымбаттаған.

Еліміздің ірі қалаларының ішінде ең қымбат жылқы еті елордада (келісі 3,3 мың теңгеден), ең арзаны Қызылордада (2,3 мың теңгеден) сатылып жатыр.