Сарайшықта Жәнібек, Әзиз-Шейх хандар тұсында соғылған мыс және күміс теңгелер көмбесі табылды

Azattyq Rýhy

Қазба жұмыстары кезінде ортағасырлық қаланың тұрғын жайлары, кәріз және үйлерді жылу жүйесі жүйесі мен тұрмыстық заттар табылды

Сарайшықта Жәнібек, Әзиз-Шейх хандар тұсында соғылған мыс және күміс теңгелер көмбесі табылды

Атырау облысындағы Хан Ордалы Сарайшық қалашығында мыс және күміс теңгелер көмбесі табылды, деп хабарлайды Azattyq Ruhy Атырау облысы Өңірлік коммуникациялар қызметіне сілтеме жасап.

Атырау облысы әкімдігінің қолдауымен, Мәдениет, мұрағаттар және құжаттамалар басқармасы, Тарих-мәдени мұраны зерттеу орталығының тапсырысы бойынша, Х.Досмұхамедов атындағы Атырау университетінің мамандары ортағасырлық Сарайшық қаласына археологиялық қазба жұмыстарын жүргізді. Аталған жұмыстар кезінде көлемі 600 шаршы метр, тереңдегі 2 метр жер зерттелді. Нәтижесінде, ортағасырлық қаланың тұрғын жайлары, кәріз жүйесі, керамикалық ыдыстар, моншақтар, диірмен тастар, өңделген сүйектер, ұршықтың тастары, қайрақ тастар, темір бұйым фрагменттері, тұрғын үйлердің жылу жүйесі табылды.

«Орта ғасырдағы Сарайшық бойынша жүргізілген археологиялық қазба жұмыстары осы жылдың 15-маусымында басталған болатын. Міне, берілген бір ай уақыт ішінде жоспарланған жұмыс аяқталып отыр. Бұл күміс тиындар ХІV ғасырдың екінші жартысына сәйкес келеді. Яғни, алтын ордалық Жәнібек, Әзиз-Шейх хандардың тұсында соғылған. Сонымен қатар, мыс тиындар мен көптеген ыдыстардың қалдықтары анықталды», деді археолог А.Зайнов.

Оның айтуынша, қазба жұмыстары кезінде ХІV ғ. ІІ жартысы, Алтын Орда дәуіріне сәйкес келетін 200 данаға жуық күміс тиындардың көмбесі анықталды. Бұл жәдігерлер Алтын Орда хандары Жәнібек және Азиз-Шейх хандарға тиесілі. Күміс тиындар көмбесінен басқа 50-ге жуық мыс тиындар табылып отыр. Сондай-ақ, тұрмыстық қалдықтардан үй жануарларының сүйектері, балық қалдықтары анықталған. Қазба жұмысында айқындалған артефактілердің нақты ақпараты лабараториялық зерттеулерден кейін белгілі болады. 

Айта кетейік, көне Сарайшықтан бұған дейін де талай құнды жәдігерлер табылған болатын.

×
Бұл желілік ресурстың ақпараттық өнімдері 18 жастан асқан адамдарға арналған.