Тұрмыстық зорлық-зомбылық, мал ұрлығы, алаяқтық, есірткі: ІІМ қылмыспен күрес жолдары туралы айтты

Полицияға құқық бұзушылықтың профилактикасы, қоғамдық тәртіпті сақтау және қылмысқа қарсы күрес бойынша тікелей міндеттер жүктелген. Құқық қорғау органдары елімізде тіркелген барлық қылмыстың 96%-ын тергейді. Әкімшілік құқық бұзушылықтың 97%-ның жолын кеседі, деп хабарлайды Azattyq Ruhy.

ҚР Ішкі істер министрлігінің мәліметінше, өткен жылмен салыстырғанда биыл алты айда қарақшылық 25%-ға, зорлау 11%-ға, бопсалау 12%-ға, мал ұрлығы 23%-ға азайыпты. Есесіне ұрлық пен тонау көбейген екен. Оған қаңтар оқиғасының әсері де бар. Ұрлықтың ең жоғары деңгейі Нұр-Сұлтан, Алматы және Шымкент қалаларында тіркеліпті.

«Жыл басынан бері Алматы облысында 800-ден астам, Ақмола мен Жамбыл облыстарында 500-ден астам, ал Түркістан облысында 400-ге жуық мал ұрланған. Тек Павлодар облысында ғана биыл мал ұрлығымен айналысқан ұйымдасқан қылмыстық топ ұсталды. Олар Павлодар, Шығыс Қазақстан және Қарағанды облыстарынан 170-ге жуық ірі қара ұрлап, ауыл адамдарына миллиондаған шығын келтірген», – деді ҚР Ішкі істер министрі Марат Ахметжанов.

Қолды болған малдың 70%-ы қараусыз қалған. Бұл – жол қозғалысына қауіп, қылмыскер үшін оңай олжа. Сондықтан жергілікті әкімдіктермен учаскелік полицейлер тығыз жұмыс істеуі керек, деді министр.

«Қазір бейнебайланыс арқылы облыс әкімдерінің орынбасарлары қатысып отыр. Сіздерге айтарым, бұл мәселеде ортақ жауапкершілік болуы керек. Өңірде болып жатқан барлық мәселе сіздерге де қатысты. Мал ұрлығынан зардап шегіп жатқан осы өңірдегі тұрғындар. Азаматтардың қауіпсіз өмір сүруіне жағдай жасау керек. Жұмыс тек қылмыстардың салдарымен күресумен шектелмеу керек», – деп атап өтті Марат Ахметжанов.

Министрлік есірткі қылмысымен күресте де ауқымды жұмыстар атқаруда. Биыл 3,5 мыңнан астам есірткі қылмысы анықталды. Үш тоннадан астам есірткі тәркіленді. 84 келісі – синтетика. 21 есірткі зертханасы жойылып, үш ұйымдасқан қылмыстық топтың жолы кесілді.

Жыл басынан бері полицияға тұрмыстық зорлық туралы 70 мың хабарлама түсті. 43 мың жағдайда шақырушы арыз беруден бас тартқан. Бірі жәбірлеушісімен татуласса, енді бірі қайталанатын қоқан-лоққыдан қорқады. Бұл жерде тәртіп сақшысының өкілеттігі шектеулі. Арыз болмаса, заң бұзушы жауапқа тартылмайды, деп түсіндірді министрлік өкілдері.

Министр тұрмыстық қылмысқа қатысты заңнамаға түзету енгізіп, әкімшілік қамауға алу мерзімін ұлғайтып, ескерту орнына қоғамдық жұмысқа тарту керектігін айтты. Арыз қабылданған соң тараптарға татуласуға бір ғана мүмкіндік беріледі, онда да сот алдында. Бұл түзетулер әбден пысықталып, мемлекеттік органдардың қарауына жіберілді.