Шымкентте жас келіншек төрт адамды алдап, 14,5 миллион теңгесін алып кеткен

Шымкентте төрт бірдей тұрғынды алдаған күдікті ұсталды, деп хабарлайды Polisia.kz.

Шымкент қаласы ПД-нің Әл-Фараби АПБ-на жергілікті тұрғын арызданған. Жәбірленушінің айтуынша, белгісіз азаматша Шымкент, Нұр-Сұлтан, Түркістан қалаларынан жағдайы төмен отбасыларға пәтер алып беремін деп сеніміне кіріп, 7 млн теңге ақшасын алып, қайтармай қойған.

Аталған жайт ҚР ҚК-нің 190 бабы 3-бөлігімен тіркелді. Шымкенттік полицейлер қылмысты дер кезінде ашып, күдіктіні ұстауға бағытталған жедел-іздестіру жұмыстарын атқарды. Нәтижесінде, бұл жайтқа қатысы бар жергілікті тұрғын ұсталды.

Белгілі болғандай, жас келіншек оңай жолмен ақша табу мақсатында дәл осылай бірнеше тұрғынды алдап келген. Күдіктінің жалпы алаяқтықтың 4 жайтына қатысы бары анықталды. Жәбірленушілерге келтірілген шығын көлемі 14,5 миллион теңгені құрады.

Қазіргі таңда күдіктіге қатысты сотқа дейінгі тергеп тексеру амалдары жүргізіліп жатыр.